Reseılik juldyzdar Astanada jetim balalardyń kontsertin tamashalady

ASTANA. QazAqparat - Ashyq aspan astyndaǵy Open Air kontsertiniń aldynda reseılik ánshiler «SOS. Balalar aýylynyń» tárbıelenýshilerine baryp qaıtty. Bul jóninde ánshi Sergeı Lazarev Instagram paraqshasynda jazdy, dep habarlaıdy QazAqparat.

«Qazaqstandaǵy Open Air qarsańynda, kúndiz Elena Temnıkovamen @lenatemnikovaofficial  jáne Maks Barskıhpen @max_barskih birge jetim balalarǵa baryp qaıttyq. Olar biz úshin keremet kontsert uıymdastyrypty. Bárekeldi! Barlyq balalar mahabbat pen súıispenshilikke bólense eken deımin! Balalardy qorǵaıyq!», - dep jazdy Sergeı Lazarev.

Eske salaıyq, keshe, 29 mamyr kúni Astanada 80 myń kórermenniń basyn qosqan Open air shoý-kontserti ótti. Ashyq aspan astyndaǵy «Uly dala birligi» kontserti Astananyń 20-jyldyq mereıtoıyna oraı uıymdastyryldy.

«Qazaq eli» monýmentiniń aldynda 30-ǵa jýyq otandyq jáne reseılik juldyzdar án shyrqady. Qazaqstandyq juldyzdar arasynda Marjan Arapbaeva, Qaırat Nurtas, Rınat Maltsagov, Beıbit Kóshqalıev, Móldir Áýelbekova, Raım jáne Artýr, «Rıngo», «Mýzart Life», «Ninety One» toptary, reseılik ánshilerden Dıma Bılan, Natan, Sergeı Lazarev, Anna Sedokova, Lena Temnıkova, Maks Barskıh, Anna Semenovıch, «Gradýsy» toby jáne taǵy basqalary bar.