Reseılik jolaýshylar Atyraýdan Antalııaǵa ushyp ketti
ATYRAÝ. QazAqparat - Novosibirden Antalııaǵa ushyp bara jatyp, aıaq astynan Atyraýǵa qonǵan Boıng-747 ushaǵynyń jolaýshylary Túrkııaǵa attanyp ketti, dep habarlaıdy QazAqparat óńirlik kommýnıkatsııalar qyzmetine silteme jasap.
Jergilikti ýaqyt boıynsha saǵat 20:55-te "Pegasus" áýe tasymaldaýshysyna qarasty Boıng-747 ushaǵynyń jolaýshylaryn alyp ketý úshin Amsterdamnan arnaıy ushaq keldi. Barlyq 190 jolaýshy ózderi kútpegen jerden tap bolǵan Atyraýdy tastap, Túrkııaǵa jolǵa shyqty.
Azamattyq avıatsııa komıtetiniń málimetinshe, ushaq 24 maýsym kúni tańerteń shuǵyl túrde Atyraýǵa qonýǵa májbúr bolǵan. Týrıstermen Atyraý oblysynyń ákimi Nurlan Noǵaev kezdesip, hal-jaǵdaılaryn surap, sabyrǵa shaqyrǵan. Ol jolaýshylarǵa qosymsha ushaqty kútý kezinde eshqandaı másele týyndamaıtynyn jetkizdi.
Jergilikti atqarýshy organdardyń kúshimen barlyq 150 týrıske psıhologııalyq jáne medıtsınalyq kómek kórsetildi. Ushaq jolaýshylaryna túski as berilip, qala qonaq úıleriniń birine jaıǵastyryldy. Tústen keıin reseılik qonaqtarǵa Atyraý oblystyq tarıhı-ólketaný murajaıyn tamashalaý usynyldy. Murajaı reseılikterge ádemi áser qaldyrdy.
Amsterdamnan ushaq kelgeni belgili bolǵan sátte qonaqtar áýejaıǵa jetkizildi. Reseılikterdi Atyraý oblysy ákiminiń birinshi orynbasary Saǵyndyq Luqpanov pen oblys ákiminiń orynbasary Nursáýle Saılaýova shyǵaryp saldy.
Jolaýshylardyń aıtýynsha, olar Atyraý týraly tek qana jaqsy ásermen attanyp barady. Olar qazaqstandyqtardyń qonaqjaı kóńili men ystyq iltıpaty úshin shyn júrekten alǵys aıtty. Ekıpajdyń qalǵan múshelerin alyp ketýge jaqynda basqa áýe kemesi keledi.
