Reseılik jazýshynyń Qurmanǵazy týraly kitaby jaryq kórdi
ALMATY. Qazannyń 14-i. QazAqparat /Erbol Azanbek/ - Reseılik jazýshy Gennadıı Vasılevtiń qazaqtyń uly kúıshileriniń biri Qurmanǵazy Saǵyrbaevtyń ómirine arnalǵan "Sary-Arqa" atty kitaby jaryq kórdi. Bul týraly QazAqparatqa Dúnıe júzi qazaqtary qaýymdastyǵy janyndaǵy saraptama ortalyǵynyń dırektory Kúlǵazıra Baltabaeva habarlady.
Orys tilinde jaryq kórgen kitapta qazaqtyń uly kúıshisiniń ómiri, basynan keshken alýan oqıǵalary sıpattalǵan. Atalǵan jazýshy - Astrahannyń týmasy. Velımır Hlebnıkov atyndaǵy syılyqtyń laýreaty, Reseı jazýshylar odaǵynyń múshesi, «Na granı mırov», «Obrýchennye vremenem», «Tam, gde Volga s sýdboı rodnıtsıa» kitaptarynyń avtory.
Kitaptyń shyǵýy Astrahandaǵy Volodar aýdany, Altynjar aýylynda Qurmanǵazy murajaıyn ashyp, Qurmanǵazy murasyna janashyr bolyp júrgen "Joldastyq" atty qazaq qaýymdastyǵynyń 20 jyldyǵymen tuspa-tus kelgen. Orys tilinde jaryq kórgen kitap qaýymdastyqtyń qurmetti tóraǵasy, Qazaq mádenıetin damytý qorynyń tóraǵasy, kásipker Nıkıta Iskakovtyń demeýshiligimen shyǵarylǵan.
