Reseılik zeınetker Qazaqstannyń qazynasyna 3,5 mln teńge qaıtarady

QOSTANAI. QazAqparat - 2003 jyldan beri Qazaqstannan zeınetaqy alyp kelgen RF azamatshasy Lıdııa Lıtvınovaǵa úkim shyqty, dep habarlaıdy QazAqparat tilshisi Qostanaı oblystyq sotynyń baspasóz qyzmetine silteme jasap.

«Áıel QR QK 190-baby 3-tarmaǵy 1-bóliginde qarastyrylǵan qylmys jasady dep tanyldy. Oǵan 3 jylǵa bas bostandyǵynan aıyrý jazasy bekitildi. QR QK 63-babyna sáıkes, onyń jazasy shartty bolyp taǵaıyndaldy», - dep habarlady sotta.

Lıtvınova quziretti memorganǵa eskertýsiz turaqty mekenjaıyn aýystyrmaýy tıis jáne ruqsatsyz basqa jerge shyǵýǵa bolmaıdy. 

«Azamattar úshin úkimet» korporatsııasynyń materıaldyq zalaldy óndirý týraly ótinishi tolyq kólemde qanaǵattandyryldy. Nátıjesinde, Lıtvınova respýblıkalyq bıýdjetke 3 mln 438 myń 718 teńge tóleıdi.

Eske salaıyq, Reseı Federatsııasynyń azamatshasy bótenniń múlkin aldaý arqyly ıemdendi dep aıyptaldy.

«Áıel 2000 jyldan bastap RF Chelıabi oblystyq zeınetaqy qorynyń bóliminde esepte tur jáne zeınetaqy alyp kelgen. ıAǵnı, ol Qazaqstanda zeınetaqy ala almaıdy.

Alaıda, 2003 jyly zeınetaqy jasyna jetken soń, L. Lıtvınova Qostanaı oblystyq «Azamattar úshin úkimet» korporatsııasynyń bólimine oǵan zeınetaqy taǵaıyndaý týraly ótinish bildirgen», - dep habarlady sottyń baspasóz qyzmeti.

Ol zeınetaqyny 2003-2018 jyldary zańsyz alyp kelgen.