Reseılik ýnıversıtetter, UBT baǵasy, jekemenshik mektepter týraly «Jelige sholý» aıdarynan bilýge bolady
Máselen, Іbek_q esimdi jeli qoldanýshysy: «Reseıge bala jiberip oqytý qajet emes. Salyq tóleýshiniń esebinen Reseıge oqytýǵa qarsymyn!»,- degen pikir qaldyrypty. QR Bilim jáne ǵylym vıtse-mınıstri Qýanysh Erǵalıev oqyrmanymyzdy tolǵandyrǵan taqyrypqa qatysty túsinikteme berdi.
Vıtse-mınıstrdiń aıtýynsha, bıyl «Bolashaq» baǵdarlamasy boıynsha oqýǵa túsýge bolatyn ýnıversıtetterdiń sany kóbeıdi. Tizimge jańadan qosylǵan joǵary oqý oryndarynyń arasynda reseılik ýnıversıtetter de bar. Máselen, osyǵan deıin 214 oqý orny bolsa endi 20-dan astam ýnıversıtet qosylyp, tańdaý múmkindigi ulǵaıdy. Ekinshiden, bul aǵylshyn tilin jetik meńgermegen, biraq orys tilin jaqsy biletin jastarymyz úshin shetelde bilim alýdyń tamasha múmkindigi,-deıdi vıtse-mınıstr. Reseılik ýnıversıtetterdiń qosylǵany AQSh, Azııa nemese Eýropalyq joǵary oqý oryndaryn tańdaýǵa esh kedergi keltirmeıdi. Mınıstrlik tek «Bolashaq» baǵdarlamasynyń geografııasyn keńeıtip, jastarǵa tańdaý aıasyn ulǵaıtyp berdi.
Marzhankb esimdi jeli qoldanýshy: «UBT tapsyrý testileriniń baǵasyn 2 esege túsirtemin degen sııaqty edi bilim mınıstri, biraq áli nátıjesin kórip turǵan joqpyz. 4230 teńge tólep otyrmyz naýryzda tapsyratyn UBT-ǵa» dep jazypty. Ulttyq testileý ortalyǵynyń dırektory Rýslan Emelbaev mınıstrdiń tapsyrmasy baıqaý UBT-syna qatysty aıtylǵanyn túsindirdi. Tapsyrma oryndalyp, onyń baǵasy 2917 teńgeden 1458 teńgege deıin, eki ese arzandady. Al, qańtar, naýryz jáne tamyz aılaryndaǵy UBT joǵary oqý ornynda grant boıynsha nemese aqyly bólimde oqýǵa sertıfıkat beretin bolǵandyqtan naýqandy ótkizýge arnaıy memlekettik komıssııa men Ulttyq testileý ortalyǵynyń barlyq qyzmetkerleri jumyldyrylady. Sol sebepti baǵasy joǵary. Alaıda, mınıstrdiń tapsyrmasynan keıin onyń da baǵasy qaıta qaralyp, 5640 teńgeden 4230 teńgege deıin arzandady.
Elenpape esimdi qoldanýshy jekemenshik mektepke qalaı túsýge bolatynyn surapty.
QR BǴM «Qarjy ortalyǵy» AQ departament dırektorynyń orynbasary Oljas Baıǵojın jekemenshik mektepterge qabyldaý komıssııasy arqyly qujat tapsyrýǵa bolatynyn aıtty. Qajetti qujattar tizimi kóp emes: ata-ananyń ótinishi, balanyń týý týraly kýáligi men 3*4 sýreti. Biraq keı mektepterdiń qosymsha talaptary bolýy múmkin. Testileý nemese suhbattasý júredi. Jekemenshik mektepte oqý jónindegi kelisim qabyldaý komıssııasy shyǵarǵan qorytyndy boıynsha jasalady. Oljas Baıǵojınniń aıtýynsha, memlekettik qoldaýdyń nátıjesinde 2019 jyldan beri elimizde 95 myń oqýshyǵa arnalǵan 287 jekemenshik mektep ashylǵan.
