Reseılik týrıster Býrabaı men Zerendide demalady
Aqmola oblysynyń kásipkerlik jáne týrızm basqarmasynyń baspasóz qyzmeti habarlaǵandaı, týrdyń basty maqsaty týrıstik kompanııalardy Býrabaı jáne Zerendi shıpajaılaryndaǵy eń jaqsy demalys oryndarymen keńinen tanystyrý boldy.
Visit Aqmola ortalyǵynyń basshysy Danııar Daırovtyń aıtýynsha, tórt kún boıy qonaqtarǵa Býrabaı jáne Zerendi kýrorttyq aımaqtarynyń eń jaqsy demalys jáne saýyqtyrý nysandary kórsetildi. Kelýshiler Nur-Sultan qalasynda da boldy. Sonymen qatar, ınfotýr aıasynda oblystaǵy demalys oryndary ókilderiniń qatysýymen B2B kezdesýi jáne Aqmola oblysynyń týrıstik múmkindikteriniń tanystyrylymy ótti.
«V2V kezdesýi biz úshin tamasha múmkindik, óıtkeni biz Býrabaıǵa aptasyna 3 júzden 5 júzge deıin qonaq ákelemiz. Biz barlyǵyn qamtıtyn týrlardy usynamyz, ıaǵnı baǵdarlamaǵa transfer, kúnine úsh mezgil tamaq, oıyn-saýyq baǵdarlamalary, taýǵa shyǵý kiredi. Bıyl Aqmola oblysyna týrısterdi Omby qalasynan, keleshekte Túmen men Qorǵannan da ákelýdi josparlap otyrmyz», - deıdi Hangout Tour týrıstik agenttiginiń dırektory Igor Streltsov.
«2014 jyldan bastap Qorǵan, Chelıabi jáne Sverdlov oblystary Býrabaı kýrortymen tyǵyz baılanysta. Osy jyldar ishinde jańa qonaq úıler men oıyn-saýyq paıda boldy. Bizdiń týrıster belsendi túrde osynda demalýǵa barady. Kezdesý qorytyndysy boıynsha biz reseılik týrıster birqatar sebepterge baılanysty jaıly qonaq úılerge bara almaıtynyn eskerip, yntymaqtastyq ornatatyn qonaq úıler qataryn keńeıtkimiz keledi, al sizderdiń demalys oryndaryńyz bizdiń kóńilimizden shyqty», - dep qosty Qorǵan oblysynyń týrızmdi damytý qaýymdastyǵynyń tóraǵasy Natalıa Krasnova.
Sońǵy kezdesý, uıymdastyrýshylardyń aıtýynsha, qonaqtarǵa áriptesterimen tájirıbe jáne aqparat almasýǵa, ózderiniń týrıstik nysandaryn tanystyrýǵa, eń bastysy, Aqmola oblysyna týrısterdi jiberý boıynsha kelisimderge qol jetkizýge múmkindik berdi.
