Reseılik turǵyn oraldyq týystaryn áleýmettik jeli arqyly tapty
ORAL. QazAqparat - Sarytaý qalasynda turatyn Serik Turlanov oraldyq týystaryn áleýmettik jeli arqyly tapty, dep habarlaıdy «QazAqparat» tilshisi.
«Qazaqstan» RTRK» AQ BQO fılıalynyń dırektory Aslanbek Ǵubashev jýyrda Sarytaý (Saratov) qalasynda bolǵan kezde Serik Turlanovpen júzdesken eken. Sonda Serik 1989 jyly Oralda túsirilgen fotony kórsetip, sýrettegi aǵaıyndaryn taýyp berýdi suraǵan. Ortada turǵan kekili kózine túsken balaqaı, búginde kásipker S.Turlanovtyń ózi bolsa, onyń oń jaǵyndaǵy jaqyn aǵaıyny Zaır Ýhmanov eken.
Birinshi qatarda ekinshi otyrǵan Seriktiń anasy Násıma. Al ákesi Jumash (tólqujaty boıynsha Dımogız) sol joly Oralǵa kele almapty. Biraq dám-tuzy taýsylar aldynda ulynan atajurtpen baılanysyn úzbeýin, aǵaıyndaryn taýyp, olarmen tabysýdy ósıet etipti.
Seriktiń amanatyn arqalap, elge oralǵan A.Ǵubashev atalmysh sýretti áleýmettik jelidegi paraqshasyna salyp, onyń týystaryn izdestirdi. Sóıtse, Z.Ýhmanovty biletinder bar eken. Sonyń biri, qazir Astanada turatyn Meńbolat Sahmetov Zaır Batyrulynyń telefonyn taýyp berdi. Ol nemere baýyry Jumashtyń balasynyń habaryn estip, qatty qýandy.
«Atam Luqpannyń (Batyrdyń ákesi) baýyry Turlannan Bekbol, odan Jumash taraıdy. Serik Jumashtyń uly, ózderi bes aǵaıyndy. Serik kishkentaı kúninde anasymen kelip ketti. Sodan keıin habar-oshar úzilip qalǵan edi», dedi jasy 85-ten asqan Zaır Ýhmanov. Qulsúıindik Baıbaqtylardyń bir bóligi Qaztalov aýdanyn qonystanǵany belgili. Ardager ózi de jas kezinde ata-anasymen birge Saratov oblysynda turǵan eken, 1958 jyly elge oralǵan. Eńbek joly barysynda on jyldaı oblystyq prokýratýrada qyzmet etken, sosyn segiz jyl Oral qalalyq sotynyń sýdıasy bolǵan. Oblystyq sotta on jyl jumys jasaǵannan keıin BQO advokattar alqasynyń tóraǵasy boldy.
S.Turlanov ta kóp uzamaı Oraldaǵy týystaryna keletinin jetkizdi. Seriktiń ózi kásippen aınalysyp qana qoımaı, birneshe jas jigit qosylyp, qazaq tilin oqytyp, halqymyzdyń salt-dástúri men mádenıetin tanytý maqsatynda «Dostar» atty qor qurǵan. Ózderi Saratovta turǵanymen, aýdandardan da nıettes jigitterdi tartqan.
Aıta keteıik, kórshiles Saratov oblysynda beıresmı esep boıynsha júz myńnan astam qandastarymyz turady. Olardyń negizgi bóliginiń aǵaıyn-týystary Batys Qazaqstan oblysynda qonys tepken. Solardyń ishinde atajurtqa at salmaı, aǵaıynnan ajyrap, túrli sebeptermen aralaspaı qalǵandary da barshylyq.
