Reseılik turǵyn Aqtóbedegi arhıvten atasynyń fotosýretin tapty

AQTÓBE. QazAqparat – Reseıdiń Novosıbırsk qalasynyń turǵyny Roman Zavadovskıı atasy týraly aqparat alý úshin Aqtóbege keldi. Oblystyq polıtsııa departamentiniń muraǵatynan 20 fotosýret tabyldy, dep habarlaıdy QazAqparat tilshisi.

28 jastaǵy Roman Zavadovskıı áýleti týraly aqparat daıyndap, shejiresin bilmek bolǵan. Atasy Ivan Zavadovskıı týraly málimetti «Memorıal» saıtynan izdegen. Barlyq aqparat Aqtóbe oblysynan ǵana tabyldy. Eki ret resmı hat jazyp, suraý salǵanymen jaýap bolmady. Ol oılana kele atasy týraly aqparat alý úshin óńirge keldi. Aqtóbe oblystyq polıtsııa departamentiniń arhıvinen 20 fotosýret tabyldy.

«Arǵy atamyz týraly aqparat, fotosýret tabyldy. Bul qýanyshty jańalyq. Fotosýretteri de jaqsy saqtalǵan. Tez ári sapaly qyzmet kórsetken polıtsııaǵa alǵys aıtamyn», - dedi Roman Zavadovskıı.

Aıta keteıik, Ivan Zavadovskıı 1891 jyly Týrýhansk ólkesinde dúnıege kelgen. Ol Qandyaǵash stansasynda eńbek etti. 1941 jyly repressııaǵa ushyrap, atý jazasyna kesilip, múlki tárkilendi. Al 1942 jyly 6 aqpanda úkim kúshine endi. SSSR Joǵary keńesiniń buıryǵymen 1989 jyly Ivan Zavadovskıı aqtaldy. Aqtóbe oblystyq polıtsııa departamenti basqarma bastyǵynyń orynbasary Aıdos Nagın Roman Zavadovskııge qundy qujattardy berip, keıin Túıetóbege apardy. Dál osy jerde onyń arǵy atasy jerlenýi múmkin.

«Ótken jyly oblystyq polıtsııa departamentine 473 hat tústi. Onyń teń jartysyna jýyǵy repressııaǵa ushyraǵandardyń týystary, urpaǵy, ǵylymı-zertteý jumysyn qolǵa alǵandar men qoǵamdyq uıym ókilderi, mýzeıler», - dedi oblystyq PD baspasóz qyzmetiniń jetekshisi Erbolat Sarqulov.