Reseılik tanymal rejısser qazaq tilinde telebaǵdarlamalar jasaýda

Reseılik rejısser Aleksandr Zamyslov qazaq jýrnalısterinen qazaq tilin úırenip júr. Reseıde tanymal bolǵan birqatar tok-shoýlardyń rejısseri qazir «Eýrazııa 1» arnasynda birneshe qazaq tildi baǵdarlamalardy jasaýǵa atsalysyp júr.

Rejısserdiń aıtýynsha, ol negizgi kúshti arnanyń biregeı qazaq tildi aýdıtorııasyn qalyptastyrýǵa salyp jatyr. Atalǵan baǵyttaǵy rejısserdiń alǵashqy qadamdary qazir «1 arna Eýrazııadan» berilip jatqan «101 keńes», «Maralbek» tok-shoýlarynan kórinis tabýda.

«Televıdenıeniń tili ortaq til. Maǵan ózim qazaq tilinde telebaǵdarlama jasaýǵa múmkindik bergeni úshin komandama alǵysymdy bildirgim keledi. Bizdiń aramyzda úlken senim ornaǵan. Onsyz eshqandaı nátıje bolmas edi. Bolashaqta qazaq tilin erkin meńgergennen keıin budan da úlken jetistikke jeterimiz sózsiz», - dedi A.Zamyslov.

Dál qazir rejısserdiń qazaqshasyn «101 keńestiń» júrgizýshisi Erkebulan Myrzabek pen Maralbek Saǵynǵan ustartyp júr.

«Qazir ol kisi Reseıden Qazaqstanǵa kóship kelgen. Jaqynda azamattyq alatyn oıy bar. Belgili rejısserdi shaqyrtý «Eýrazııa 1» arnasynyń qazaq tildi baǵdarlamalarynyń reıtıngisin kóterý úshin jasalǵan qadam edi», - dedi arnanyń arnaıy jobalar qyzmetiniń kreatıvti menedjeri Gaýhar Áldibekova.

Belgili rejısser buryn «Professııa - reporter», «Pýt patrıarha. Pamıatı Aleksııa II», «Bolshaıa ıgra prezıdenta», «Solovkı. Mesto sıly», «Enrıke Karýzo»,«Poslednıı geroı 1-5», «Fabrıka zvezd -7» baǵdarlamalarynda qoıýshy-rejısser qyzmetin atqarǵan.

Aıta keterligi, osy aptada arnada «FIFA: Fýtbol 14» atty baǵdarlamanyń tusaýkeseri bolmaq. Tok-shoý janryndaǵy jobada teńbil dop óneriniń basty jańalyqtary talqylanatyn bolady.

Atalǵan joba Aleksandr Zamyslovtyń qatysýymen túsirilgen úshinshi baǵdarlama bolyp otyr.