Reseılik tanymal ánshi Dıana Gýrtskaıa kóz janarynan aıyrylǵan qazaqstandyq balalarǵa dáris beredi
ASTANA. QazAqparat - Reseılik tanymal ánshi Dıana Gýrtskaıa kóz janarynan aıyrylǵan qazaqstandyq balalarǵa dáris beredi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıgte MýzTV telearnasynyń bas dırektory Arman Dáýletııarov málim etti.
«Biz óner juldyzdarymyzdyń qaıyrymdylyq aktsııalaryna qatysýyna ýaǵdalastyq. Máselen, bir aktsııa barysynda Dıana Gýrtskaıa kózi kórmeıtin balalarmen kezdesip, olarǵa sheberlik sabaǵyn ótkizedi», - dedi ol.
Sonymen qatar onyń atap ótýinshe, «Astana-Arena» stadıony aldynda ótetin qaıyrymdylyq gala-kontsertine Qazaqstannyń túpkir-túpkirinen múgedek balalar, balalar úıleriniń tárbıelenýshileri jáne az qamtylǵan otbasylardyń balalary jetkiziletin bolady.
«Biz «Mýz TV» syılyǵyna arnalǵan 2 myńnan astam bıletti dál osy maqsattarda tegin bólemiz. Bul bizdiń «Mýz TV» syılyǵy shoýyn ótkizýdegi negizgi maqsattarymyzdyń biri. Sondyqtan da bizdiń kóptegen ártister qaıyrymdylyq sharalaryna qatysady»,- dedi A.Dáýletııarov.
Aıta keterligi, MýzTV syılyǵyn tabys etý shoýy 5 maýsym kúni elordadaǵy «Astana-Arena» stadıonynda ótedi. Odan bir kún buryn 25 qazaqstandyq, 25 reseılik óner juldyzynyń qatysýymen gala-kontsert uıymdastyrylady.
