Reseılik «Spýtnık V» vaktsınasy nelikten Qaraǵandynyń farmkesheninde óndirilýde
QARAǴANDY. QazAqparat – Qaraǵandy farmatsevtıkalyq kesheni (QFK) COVID-19-ǵa qarsy vaktsına shyǵaratyn alań retinde tańdaldy. Qazaqstan Respýblıkasynyń Prezıdenti Qasym-Jomart Toqaev pen Reseı Federatsııasynyń Prezıdenti Vladımır Pýtın arasyndaǵy ýaǵdalastyqtardy júzege asyrý aıasynda munda reseılik «Spýtnık V» vaktsınasynyń alǵashqy úlgisi shyǵaryldy, dep habarlaıdy QazAqparat tilshisi.
Qarasha aıynda QR Densaýlyq saqtaý mınıstrliginiń komıssııasy men RQAO mamandary Qazaqstannyń farmatsevtıkalyq kásiporyndaryn aralady. Olar negizinen osy nysandardyń tehnologııa transfertin jyldam júzege asyrýǵa jáne vaktsına óndirýge daıyndyǵyn zerttedi. QFK bıotehnologııalyq kásiporyn bolǵandyqtan, Qaraǵandy farmkesheni eń daıyn kásiporyn bolyp shyqty. Olardyń jabdyqtary men protsesteri vaktsınanyń daıyn formasyn óndirý tehnologııasyna sáıkes keledi.
«Jeltoqsan aıynyń basynda protsess transferi bastaldy. Reseıden mamandar keldi. Olar óndiris alańy jumysynyń aýdıtin júrgizdi jáne usynystar berdi. Biz óz kezegimizde barlyq qajettilikterdi tez ázirledik. ıAǵnı, biz jabdyqtardy retke keltirip, mamandardy daıyndadyq. Qazir serııalyq óndiriske arnalǵan jabdyqtardy ázirlep jatyrmyz. Keshe biz osy vaktsınanyń tájirıbeli serııalaryn shyǵardyq. Búgin olar Reseıge sapasyn baqylaýǵa jiberildi», - dep túsindirdi QFK bas dırektory Sergeı Baron.
Bir aı ishinde Reseıdiń N.F. Gamaleıa atyndaǵy epıdemıologııa jáne mıkrobıologııa ǵylymı ortalyǵynda sapany baqylaý júrgiziledi. Nátıjelerdi alǵannan keıin QR Densaýlyq saqtaý mınıstrligine tirkeýge ótinim beriletin bolady. Vaktsına Qazaqstanda tirkelgen soń, onyń ónerkásiptik óndirisi bastalady. Vaktsınanyń ıesi - «Reseıdiń tikeleı ınvestıtsııalar qory». Al Qaraǵandy farmatsevtıkalyq kesheni óndiris alańy bolyp tabylady.
Qosymsha Qaraǵandy farmatsevtıkalyq keshenine vaktsınany shokty qatyrý protsesi úshin qajetti tońazytqysh jabdyǵyn satyp alý qajet boldy.
«Bizdiń aldymyzǵa qysqa merzimde transfer júrgizý jáne bizdiń óndiristik alańymyzda reseılik «Spýtnık V« vaktsınasynyń daıyn túrin óndirýdi jolǵa qoıý mindeti qoıyldy. QR Densaýlyq saqtaý mınıstrligi 4 jeltoqsanda «Reseı tikeleı ınvestıtsııalar qory« memlekettik kompanııasy –tehnologııa ıesimen jáne noý-haýmen yntymaqtastyq týraly kelisimge qol qoıdy. 13 jeltoqsanda bizge daıyn ónimniń valıdatsııalyq serııalaryn óńdeýge arnalǵan sýbstantsııa berildi», - deıdi QFK bas dırektory Sergeı Baron.
Aıta ketý kerek, «Qaraǵandy farmatsevtıkalyq kesheni» JShS - birinshi otandyq bıotehnologııalyq kásiporyn. Zaýyt jetekshi eýropalyq óndirýshilerdiń jabdyqtarymen jabdyqtalǵan. 2012 jyldan bastap QFK óndirisin damytýǵa salynǵan ınvestıtsııalar kólemi 100 mln teńgeni qurady.
