Reseılik shańǵyshy halyqaralyq jarystarda Qazaqstannyń namysyn qorǵaıdy
ALMATY. QazAqparat – Reseılik jas shańǵyshy Aleksandra Skorohodova 2024 jyly Ońtústik Koreıada ótetin jasóspirimder arasyndaǵy qysqy Olımpıada oıyndaryna qatysyp, Qazaqstannyń namysyn qorǵaıdy. Bul týraly Almatyda ótken baspasóz máslıhatynda málim boldy, dep habarlaıdy QazAqparat tilshisi.
Aleksandra respýblıkalyq jarystarǵa, Qazaqstan Respýblıkasynyń kýbogi men Qazaqstan Respýblıkasynyń chempıonatyna jáne 2024 jyly Ońtústik Koreıada ótetin jasóspirimder arasyndaǵy qysqy Olımpıada oıyndaryna qatysady.
Baspasóz málıhatynda Taý shańǵysynan qazaqstandyq jattyqtyrýshy, Almatydaǵy joǵary sport sheberligi mektebiniń aǵa jattyqtyrýshysy Mark Shparberg Aleksandra Skorohodova ulttyq quramaǵa qalaı qabyldanǵanyn aıtyp berdi.
«Aleksandra Skorohodova jaqsy nátıje kórsetken soń ózimizge qabyldadyq. Qazirgi ýaqytta 16-17 jastar arasynda myqtylardyń biri. Biz de sportshylarymyzdyń deńgeıin kóterý úshin qabyldadyq, óıtkeni sportta myqty bolý úshin ózińnen myqtylarmen birge jattyǵý kerek. Ol óz mansabyn bizben jalǵastyrýdy sheshti, óıtkeni búgingi álemde qandaı jaǵdaı bolyp jatqanyn bárińiz bilesizder. Qazir ol bizben birge jattyǵyp, Qazaqstan quramasynyń sapynda oınaıdy», - deıdi Mark Shparberg.
Aıtýynsha, bolashaǵy bar sportshy.
«Bolashaǵy bar. Ol – Reseıdiń absolıýtti chempıony. Bizde de tamasha nátıje kórsetti. Joǵary deńgeıdegi jarystarda Aleksandra ekinshi áreketinde Eýropa kýbogi deńgeıindegi sportshylarǵa ǵana ese jiberip qoıdy. Nátıjesinde, 100 adamnyń ishinde 13-shi boldy», - dedi ol.
Aıta keteıik, Aleksandra Skorohodova bıyl Qazaqstan Respýblıkasynyń azamattyǵyn aldy.
Foto: www.fgssr.ru
