Reseılik sarapshy Nazarbaevtyń BUU QK alańyndaǵy joldaýyn joǵary baǵalady
ASTANA. QazAqparat - Qazaqstan Prezıdenti Nursultan Nazarbaevtyń BUU Qaýipsizdik Keńesi pikirsaıystarynda jarııa etilgen saıası joldaýyndaǵy barynsha qyzyqty usynystardyń biri antıterrorıstik operatsııalar júrgizýge Astana kodeksin ázirleý ıdeıasy boldy.
Mundaı pikirdi QazAqparattyń Máskeýdegi arnaýly tilshisi Medet Ahmetovke MMÝ Aqparattyq-saraptamalyq ortalyǵy Baltyq elderi bóliminiń jetekshisi Sergeı Rekeda bildirdi, dep habarlaıdy QazAqparat.
Sarapshynyń pikirinshe, Astana kodeksin qabyldap, júzege asyrý terrorıstik qaýipten qorǵanysty qamtamasyz etedi jáne adam quqyqtary normalaryna saı keledi.
«Qazaqstan Prezıdentiniń «Qaýipsiz, ádil jáne gúldengen álem qurý úshin jahandyq áriptestikti nyǵaıtýǵa qazaqstandyq tujyrymdamalyq kózqaras» atty saıası joldaýy «úılesimdi» sózin barynsha naqty sıpattaıdy. Óıtkeni, onda Qazaqstannyń tikeleı óziniń múddesi, sonymen birge tolyqtaı alǵanda halyqaralyq qaýipsizdik múddesi naqty kórinis tapqan», - dedi sarapshy.
Onyń aıtýynsha, saıası joldaýda ortaazııalyq óńirdiń ishki qaýipsizdigine jáne Qazaqstan basshylyǵy únemi ilgeriletip otyrǵan ıadrolyq qaýipsizdik máselesine basa nazar aýdarylǵan.
«Árıne, kúntártibindegi antıterrorıstik máselege basa nazar aýdarylǵan. Óıtkeni, bizdiń barlyǵymyz da munyń halyqaralyq qaýipsizdiktiń negizgi «qamshysy» ekendigin bilemiz», - dedi Rekeda.
Onyń paıymynsha, antıterrorıstik operatsııalar júrgizýge Astana kodeksin ázirleý ıdeıasy -Qazaqstan basshysynyń barynsha qyzyqty usynysy.
«Dástúrli áskerı is-qımyldarǵa qatysty bizde olardy retteıtin erejeler men normalar, qujattar kóp. Al dál osy terrorıstik qaýiptiń barynsha ózekti ekenin eskersek, mundaı normalardyń joqtyǵy alańdatady», - dedi ol.
