Reseılik Rústem Arslanov: Álem barysyndaǵy basty qarsylastarym – qazaq balýandary

  ASTANA. QazAqparat- Astanada ótip jatqan «Álem barysy» dodasynda reseılik balýan Rústem Arslanov alǵashqy kezdesýinde Lıvııadan kelgen qarsylasy Obeıd Vassımdi taza utyp, kelesi kezeńge joldama aldy. Beldesýden keıin Reseıdiń Bashqurtstan elinen kelgen áńgimeleýdiń sáti tústi.

Rústem Arslanov qazaq kúresine burynnan beri qyzyǵyp júrgenin aıtady. Balýan 1980 jyly dúnıege kelgen. Ulty bashqurt. Bir qyzyǵy, qazaq kúresine den qoıǵannan bastap-aq, Rústem aıtarlyqtaı kórsetkishke qol jetkizgen eken.
 

«Ótken jyly Qyrǵyzstanda ótken Kóshpendiler festıvalinde birinshi ret qazaq kúresinen baǵymdy synap kórdim. Ol kezde qazaqtyń myqty balýandarynyń biri sanalatyn Elamanmen aqtyq básekede kúsh synasqan edim. Jolym bolyp sol joly Elamandy jeńip, birinshi oryndy ıelendim. Qazaq kúresin meńgerý men úshin eshqandaı kedergi týdyrǵan joq. Ózim negizinen sambo jáne dzıýdo kúresin meńgergenmin. Jetistikterim de barshylyq. Dzıýdodan eki márte absalıýtti salmaqta Reseı Federatsııasynyń chempıony atandym. Sambodan 2015 jyly Eýropa chempıony boldym», - deıdi Rústem.
 

Reseılik balýan sonymen birge, osy saıystaǵy eń basty qarsylastarynyń kim ekenin atady.

«Bul jaqqa kelip qazaqtarmen óz tilimde uǵynysyp júrmin. Bárin túsinemin. Osyndaı shoýdyń bolyp jatqany shynynda da maqtan tutarlyq. Birinshi kezdesýim kúrdeli bolǵan joq. Mundaǵy báseke týraly surasańyz, álbette, eń birinshi kezekte Qazaqstan balýandary - meniń basty qarsylastarym. Ýkraına, Belorýs pen Grýzııanyń balýandary osal emes. Jerebe boıynsha sońǵy atalǵan elderdiń kil myqtylaryna túsip qalǵan sekildimin. Dese de, jeńisime senimdimin», - deıdi bashqurt sportshysy.