Reseılik rejısser ańyzǵa aınalǵan 28 panfılovshynyń erligi jónindegi fılmdi bıyl kúzde tanystyrmaq
ASTANA. QazAqparat - Jaqyn sheteldik eki birdeı kınostýdııa qazaqstandyq jurtshylyqtan qarjylyq demeý jasaýdy ótinip otyr.
Qazirgi kezde reseılik rejısser Andreı Shalopanyń «28 panfılovshy» týraly túsirip jatqan fılminiń taǵdyry qarjylyq kómekke baılanysty bolyp otyr. Sonymen qatar qyrǵyz rejısseri Nurlan Abdyqadyrovtyń «Úılený toıy marafony nemese bombamen saıahatttaý» komedııasy da qosymsha qarjylandyrýdy qajet etýde. Bul jaıynda «Ekspress-K» basylymy «Otstýpat nekýda - pozadı bıýdjet» atty maqalada jazdy.
Andreı Shalopa birneshe márte reseılik sheneýnikterden 2 mln. dollar bólý týraly ótinish jasaǵan, alaıda olar kınoǵa qarjy aýdarýdan bas tartyp otyr. Osy máseleni ǵalamtorda jarııalaǵannan keıin ǵana rejısserge jeliniń 20 myń paıdalanýshysy 500 dollar kóleminde qarjy jınap bergen.
Tek osydan keıin ǵana reseılik sheneýnikter kómek qolyn sozýǵa nıettengen, alaıda Andreı Shalopa memlekettik qarjydan bas tartty. Osy oraıda rejısser sheneýnikterdiń qysymynsyz halyqtyq-patrıottyq kınony túsirgisi keledi. Sonymen qatar ol kıno juldyzdarynyń da kómegine júginbegen eken. Bul týyndy panfılovshylardyń tek sońǵy urysyna ǵana arnalmaq. Fılmniń túsirilimi naýryzda Sankt-Peterbor mańynda bastaldy. Búginde kınonyń bıýdjeti sarqylsa da, ol bıylǵy qarashada kınolentanyń tanystyrylymyn ótkizýge úmittenip otyr.
Al Qyrǵyzstannyń rejısseri Nurlan Abdyqadyrovke «Úılený toıy marafony nemese bombamen saıahattaý» fılmin aıaqtaýǵa shamala qarjy jetispeı turǵan kórinedi. Aıta keteıik, bul kınoǵa «Qazaq-qyrǵyz - bir týǵan» degen ekinshi ataý berilgen eken.
Fılm sıýjetine toqtalatyn bolsaq, qyrǵyzstandyq bir otbasy qalyńdyq aıttyrý úshin Almatyǵa taý asýy arqyly barady. Shekarany zańsyz ótkeni úshin ustalǵan olar kelisim jasaýǵa májbúr bolady: Almatyǵa deıin bir jáshik mınany jetkizip salýǵa kelisedi.
Kartınanyń mazmuny túkpirdegi eldi mekenderde turatyn adamdardyń qarapaıymdyly men qazaq jáne qyrǵyz halyqtarynyń jaqyndyǵyn baıandaıdy.
