Reseılik «Proton-M» zymyrantasymaldaǵyshynyń ushý sapary, qazaqstandyq tarappen kelisilmeýiniń saldarynan, keıingi ysyryldy
BAIQOŃYR. Qarashanyń 24-i. QazAqparat /Sara Qabıqyzy/ - Keshe, qarashanyń 23-inde Astana ýaqyty boıynsha saǵat 20.19-da ushýy kerek bolǵan «Dabl ıÝ 7» eýropalyq ǵarysh apparaty ornatylǵan «Proton-M» zymyrantasymaldaǵyshynyń sapary keıinge ysyryldy.
Ushýǵa birneshe saǵat qalǵanda, «Reseıǵarysh» agenttiginiń baspasóz qyzmetine, zymyrantasymaldaǵyshtyń sapary, reseılik tarapqa qatysy joq sebeptermen, keıinge ysyrylǵanyn habarlady. «Barlyq qujattar «QazǴarysh» agenttigi men Qazaqstan Respýblıkasynyń Úkimetine aldyn-ala jóneltilgen jáne tıisti ázirlik jumystary tolyq kólemde júrgizilgen bolatyn», delingen «Reseıǵarysh» agenttiginiń saıtynda jarııalanǵan aqparatta. «Bul, reseılik tarapqa táýeldi emes sebeptermen, ushý sapary keıinge ysyrylyp otyrǵan birinshi jaǵdaı emes», - dep atap kórsetilgen agenttiktiń habarlamasynda.
Qazǵarysh agenttiginiń baspasóz qyzmeti qalyptasqan jaǵdaıǵa baılanysty óz túsiniktemesin berip otyr. ««Dabl ıÝ 7» ǵarysh apparatyn ushyrý sapary Qazaqstan Respýblıkasy Úkimetiniń 2008 jyly jeltoqsannyń 26-syndaǵy qaýlysymen bekitilgen «Baıqońyr» ǵarysh aılaǵynan ǵarysh apparattaryn jáne zymyrandaryn ushyrýdyń taraptardyń kelisilgen 2009 jylǵy josparynda qarastyrylmaǵan», delingen Qazǵaryshtyń málimdemesinde.
Aǵymdaǵy jyldyń ortasynda, reseı tarabynyń ótinishi boıynsha, basqa ǵarysh apparattaryn qospaǵanda, «Proton-M» zymyrantasymaldaǵyshtarymen «AzıatSat-5», «IntelSat-16» jáne «AMS-4R» ǵarysh apparattarynyń qosymsha ushý saparlary qarastyrylǵan Ǵarysh apparattaryn ushyrý josparlary boıynsha túıindemege ózgertýler engizilgen bolatyn. Bul ózgertýler Qazaqstan Respýblıkasy Úkimetiniń 2009 jyly tamyzdyń 6-syndaǵy №1195 qaýlysymen bekitildi. «Proton-M» zymyrantasymaldaǵyshymen «Dabl ıÝ 7» ǵarysh apparatyn ushyrýdy kelisý týraly reseılik taraptyń kezekti ótinishi 2009 jyly qyrkúıektiń 26-synda alyndy.
Qazaqstan Respýblıkasynyń barlyq múddeli memlekettik organdarymen kelisilgennen keıin, Ǵarysh apparattaryn ushyrý josparlary boıynsha túıindemege atalmysh ózgertýdi engizý týraly Úkimet qaýlysynyń jobasy Qazaqstan Respýblıkasy Premer-Mınıstriniń Keńsesine engizildi. Úkimettiń sheshim qabyldaý úderisi uzaq ýaqytty qajet etetindigin jáne ol úderistiń áli aıaqtalmaǵanyn eskere otyryp, tıisti málimet «Reseıǵarysh» agenttiginiń quzyryna jetkizilgen bolatyn.
Oǵan qosa, aǵymdaǵy jyly qarashanyń 2-sinde «Reseıǵaryshtan» «Proton-M» zymyrantasymaldaǵyshymen «Dırek TV-12» ǵarysh apparatyn ushyrý saparyn kelisý týraly kezekti ótinish tústi. Qazirgi ýaqytta ol sapardyń múmkindigi de múddeli memlekettik organdarmen kelisilýde.
Osylaısha, reseılik taraptyń «Baıqońyr» ǵarysh aılaǵynan ǵarysh apparattary men zymyrandaryn ushyrý jospary boıynsha kelisim berý jáne alý týraly 1999 jylǵy qarashanyń 18-indegi úkimetaralyq kelisimniń baptaryn saqtamaýy, Qazaqstan Respýblıkasynyń Úkimetimen kelisilgen jyldyq ushý josparyna únemi ózgertýlerdiń engizilýi, «Baıqońyrdan» zymyrandardy óz ýaqytynda ushyrylýyn qamtamasyz etýde problema týǵyzyp otyr», delingen «Qazǵaryshtyń» habarlamasynda.
«Baıqońyr» ǵarysh aılaǵynyń №200 ushyrý alańynda turǵan «Proton-M» zymyrantasymaldaǵyshy sáıkes sheshimdi kútip tur. Ony ushyrýdyń rezervtik ýaqyty - búgin, qarashanyń 24-i, Astana ýaqyty boıynsha saǵat 20.19.
