Reseılik prodıýserlerdi qazaqtardyń soǵys taktıkasy qyzyqtyrdy - «Qasym» fılminiń atqarýshy prodıýseri Á.Baımuhamedova
Búgin Astanada ótken baspasóz máslıhatynda fılmniń atqarýshy prodıýseri Álııa Baımuhamedova osylaı aıtty.
«Negizi, Qasym Qaısenovtyń tulǵasy áli kúnge deıin qupııa ǵoı. Onyń soǵys máneri men taktıkasyn kóbisi bilmeıdi. Reseılik prodıýserler Ýkraınada bolyp, jergilikti halyqtyń estelikterin de jazyp alǵan kórinedi. Ol jaqta Qasym aǵany áli kúnge deıin «partızan Vasıa» dep biledi. "Biz nemis pen slavıan halyqtarynyń soǵys taktıkasyn jaqsy bilemiz. Ol týraly talaı fılmder de túsirilgen. Al azııalyqtardyń soǵys kezindegi psıhologııasy jaıynda kóp bile bermeımiz", deıdi kórshi eldiń prodıýserleri. Endeshe, «Qasym» fılmi sonysymen de qyzyq. Sebebi Qasym Qaısenov óz taktıkasymen jaý betin qaıtara bilgen», - degen pikir bildirdi Á.Baımuhamedova.
Aıta keteıik, «Qasym» atty tórt serııaly týyndy «Qazaqstan» ulttyq arnasy, «Eýrazııa» birinshi arnasy, «INTRA Communication» (Reseı) jáne «FILM UA» (Ýkraına) kompanııalarynyń qatysýymen túsirildi. Fılmde Qasymnyń rólin Qalıbek Qýanyshbaev atyndaǵy qazaq drama teatrynyń akteri Qýandyq Qystyqbaev somdaǵan. Stsenarıı avtory - Andreı Kýreıchık. Rejısseri - Leonıd Belozorovıch.
