Reseılik prodıýserler Qazaqstandy Táýelsizdik kúnimen quttyqtady

MÁSKEÝ. QazAqparat - Tanymal reseılik prodıýserler Barı Alıbasov pen Arman Davletıarov Qazaqstandy Táýelsizdik kúnimen quttyqtady, dep habarlaıdy QazAqparat tilshisi.

«Meniń taǵdyrym Qazaqstanmen tikeleı baılanysty. Otanym bolǵandyqtan, men árdaıym erekshe maqtanyshpen Qazaqstan Respýblıkasynyń Táýelsizdik kúnin jaqsy atap ótemin. Sanaly ǵumyrymnyń basym bóligin Qazaqstanda ótkizdim, damyǵanyn kózben kórdim. Nursultan Ábishuly barlyq qazaqstandyqtardyń aldyna memleket qurý  mindetin qoıǵany áli esimde. Qazaqstan bul maqsatqa qol jetkizdi», - dedi Barı Alıbasov Qazaqstan Respýblıkasynyń Táýelsizdik kúnine oraı Reseı Federatsııasynyń Qazaqstan Respýblıkasyndaǵy Elshiliginde uıymdastyrylǵan saltanatty qabyldaý kezinde.
Prodıýser bilim alyp, ártis, eń bastysy adam bolýyna kómektesken Qazaqstan halqyna alǵysyn bildirdi.Qazaqstandyqtardy sonymen birge Táýelsizdik kúnimen «Mýz-TV» mýzykalyq arnasynyń dırektory Arman Davletıarov ta quttyqtady.
«Barlyq qazaqstandyqtardy Táýelsizdik kúnimen quttyqtaımyz! Barshańyzǵa baqyt, ıgilik jáne jarqyn jetistikterdi tileımin»- dep atap ótti A. Davletıarov «QazAqparat» HAA tilshisine.
Reseıde turyp jatqan ol qazaqstandyqtar týraly, Qazaqstan men Nazarbaev týraly óte jaqsy pikirlerdi jıi estıtinin aıtady.
«Men óz elimniń, halqymnyń, tipti tutastaı adamzattyń ıgiligi úshin uly ister tyndyryp jatqan Prezıdentimizdiń baryn maqtan tutamyn. Nursultan Nazarbaev - Qazaqstandy osyndaı joǵary deńgeıge kótergen uly saıasatker. Men qazaq ekenimdi shynaıy maqtan tutamyn», - dedi ol. 

Avtor: Medet Ahmetov