Reseılik parlamentarııler Astanadaǵy «Din lańkestikke qarsy» atty halyqaralyq konferentsııaǵa qatysady
ASTANA. QazAqparat - Reseılik parlamentarııler Astanada 31mamyrda ótetin «Din lańkestikke qarsy» atty halyqaralyq konferentsııaǵa qatysady. Bul týraly búgin QR Parlamenti Senatynda RF Federaldyq Jınalysy Federatsııa Keńesiniń Tóraıymy Valentına Matvıenko málim etti.
«Biz halyqaralyq konferentsııaǵa ózimizdiń ókilderdi jiberýdi josparlap otyrmyz. Konferentsııaǵa daıyndyq boıynsha uıymdastyrýshy komıtettiń jumysyn QR Parlamenti Senatynyń Tóraǵasy Qasym-Jomart Toqaev basqaratyny belgili. Osy konferentsııaǵa qatysýǵa erekshe mańyzdylyqpen qarap otyrmyz»,-dedi V.Matvıenko.
Osy rette ol lańkestik qazirgi zamandaǵy eń qaýipti syn-qaterdiń biri ekenin atap ótti. Onyń paıymynsha, lańkestikpen kúreste barlyq memleketterdiń, parlamentterdiń, konfessııalardyń, azamattyq qoǵam ınstıtýttarynyń kúsh-jigerin biriktirý asa mańyzdy.
«Osy qaterdi tıisti deńgeıde baǵalamasaq, adamzattyń damýy men órkenıetke degen qaýip seıilmeıdi. Atap aıtqanda, Qazaqstanda bundaı halyqaralyq dıalogtar turaqty túrde uıymdastyrylyp keledi. Osy sharada parlament músheleriniń, álemdik dinder ókilderiniń basyn qosý óte durys sheshim dep baǵalaımyn. Astanadaǵy bul konferentsııany ótkizýge ózimizdiń úlesimizdi qosýǵa tyrysamyz»,-dedi V.Matvıenko.
