Reseılik otbasy «Samara-Shymkent» trassasynda balasyn joǵaltyp aldy
NUR-SULTAN. QazAqparat – Qyzylorda oblysynda trassada umyt qalǵan reseılik bala otbasyna qaıtaryldy. Bul týraly QazAqparat QR Іshki ister mınıstrliginiń Polisia.kz saıtyna silteme jasap habarlaıdy.
Shıeli aýdandyq polıtsııa bólimine Sh. Qodamanov aýyly mańyndaǵy trassadan tabylǵan bala týraly aqparat kelip túsken. Tún ishinde jalǵyz júrgen 9 jasar balany Samara-Shymkent tasjolynyń 1957-1907 shaqyrymynda Sýnaq ata kenti men Qyzylorda oblysynyń 19-shy bólimshesi mańynda patrýldik polıtseıler baıqaǵan.
Olar balany Shıeli aýdandyq polıtsııa bólimine jetkizip, qalaı adasqanyn surastyrǵan jáne birden ata-anasyn izdestirý jumystaryn bastaǵan.
«Tekserý barysynda 9 jasar jetkinshek ata-anasymen birge saparlap kele jatqany belgili boldy. Jol boıynda kólik turaqqa toqtaǵan jáne ata-ana kólikten túsken. Sol sátte avtokóliktiń artqy oryndyǵynda uıyqtap jatqan bala oıanyp, syrtqa shyqqan. Ata-anasy ony baıqamaı, kólikti otaldyryp, saparyn jalǵastyrǵan. Qyzmetkerler shuǵyl túrde sur tústi Lada-Vesta kólikterin toqtatýǵa tapsyrma berdi. Jedel-izdestirý áreketiniń arqasynda kólik turaqtarynyń birinen balanyń ata-anasy tabyldy. Polıtseıler kelgende ǵana ata-ana balasynyń kólikten túsip qalǵanyn baıqaǵan», - delingen habarlamada.
Áńgime barysynda olardyń Reseı azamattary ekendigi jáne Tájikstanǵa bara jatqany belgili boldy. Olar balamen týystyǵyn rastaıtyn barlyq qajetti qujattardy kórsetti. Ata-ana polıtsııaǵa jedel áreket etkenderi úshin jáne ulynyń ómirin saqtap qalǵany úshin alǵys aıtty.
