Reseılik ortoped Shymkenttik dárigerlermen birge kúrdeli 10 ota jasady
ShYMKENT. QazAqparat - Reseılik ortoped Rafael Popısıants Shymkenttik áriptesterine sheberlik dárisin ótkizip, kúrdeli 10 ota jasady. Qazir tizesin protezdegen naýqastardyń jaǵdaıy qanaǵattandyrarlyq, deıdi mamandar, dep habarlaıdy QazAqparat HAA tilshisi.
Meıram qarsańynda reseılik dáriger Shymkentke arnaıy kelip, áriptesterimen tájirıbe bólisken. Sóıtip aınaldyrǵan 4 kún ishinde jaǵdaıy aýyrlaǵan naýqastarǵa birlesip ota jasady. Bilikti ortoped qazaqstandyq mamandardyń da kásibı biliktiligine joǵary baǵa berdi.
«Munda kelgeli qazaqstandyq dárigerlerdiń kez kelgen jańashyldyqqa tez beıimdeletinin ańǵardym. Bul ota jasaý isinde úlken mańyzǵa ıe. Sonyń nátıjesinde qazir bizdiń emdelýshiler otadan soń, ózin jaqsy sezinedi. Endi bir aıdyń kóleminde tolyǵymen jazylyp ketetinine senimdimin. Jalpy, qazaqstandyq dárigerlerdiń mundaı otalardy jasaýǵa óz biliktilikteri de jetkilikti»,- deıdi joǵary dárejeli travmatolog-ortoped Rafael Popısıants .
Búginde Shymkent qalalyq jedel járdem aýrýhanasynda tize býynyn totaldy endoprotezdeý otalaryn jasaý birneshe jyldan beri qolǵa alynǵan. Dárigerler otalardyń basym kópshiligi sátti ótetinin aıtady.
«Jańa ota naýqastarǵa jeńildeý jasalady. 15-20 jyl boıy tizesi aýyrǵan naýqastar endi esh ýaıymsyz jaıly júre alady. Osynyń bárine járdem berip jatqan osy ımplanttar. Negizinen, amerıkalyq «Stryker» kompanııasynyń ımplanttaryn salyp jatyrmyz. Sapasy kóńilimizden shyǵady, otalardyń barlyǵy kvota negizinde tegin jasalýda»,-deıdi Shymkent qalalyq jedel járdem aýrýhanasynyń bólim meńgerýshisi Marat Úsenov.
Ótken jyly emdeý mekemesinde 60 myńnan astam ota jasalǵan. Oqystan aýyr jaraqat alyp, súıegin syndyrǵan jandar nemese kárilikke baılanysty aıaǵyn jaza almaı qalǵandardyń aýrýhanada tegin operatsııa jasatýyna jaǵdaı jasalǵan.
