Reseılik Mı-24 tikushaǵyn Armenııanyń Ázerbaıjanmen shekarasynda atyp túsirdi

MÁSKEÝ – BAKÝ. TASS – AZERTADJ – QazAqparat – Armenııanyń Ázerbaıjanmen shekarasyndaǵy áýe keńistiginde reseılik Mı-24 tikushaǵyn jyljymaly zenıttik zymyran kesheninen (JZZK) atqan, ekıpajdyń eki múshesi qaza tapty, taǵy bireýi jaraqat aldy. Bul týraly dúısenbide Reseı Qorǵanys mınıstrligi málimdedi, dep habarlaıdy QazAqparat TASS agenttigine silteme jasap.

«9 qarashada Máskeý ýaqytymen 17:30 shamasynda Armenııa Respýblıkasynyń aýmaǵy boıynsha 102-shi Reseı áskerı bazasynyń avtokolonnasymen Nahıchevan Avtonomııalyq respýblıkasynyń (Ázerbaıjan Respýblıkasy) shekarasyna jaqyn ornalasqan Erash armıan eldi mekeniniń janyndaǵy áýe keńistiginde reseılik

Mı-24 tikushaǵyna JZZK-dan oq jaýdyrǵan. Zymyran soqqysynyń saldarynan tikushaq basqarýdy joǵaltyp, Armenııadaǵy taýly aımaqqa qulaǵan», - dep habarlady reseılik áskerı vedomstvo.

«Eki adam qaza tapty. Ortasha aýyrlyqtaǵy jaraqat alǵan bireýi ornalasý áýe aılaǵyna evakýatsııalandy», - dep atap ótti Qorǵanys mınıstrliginen.

Mı-24 tikushaǵy Armenııanyń áýe keńistiginde, urys aımaǵynan tys jerde jyljymaly zenıttik zymyran kesheninen atyldy, dep habarlady Reseı Qorǵanys mınıstrliginiń resmı ókili, general-maıor Igor Konashenkov.

Óz kezeginde, AZERTADJ habarlaǵandaı, oqıǵaǵa baılanysty Ázerbaıjan SІM málimdeme jasady. «Ázerbaıjan tarapy kezdeısoqtyq sıpatyndaǵy jáne Reseı tarapyna qarsy baǵyttalmaǵan osy qaıǵyly oqıǵaǵa baılanysty Reseı tarapynan keshirim suraıdy. Ázerbaıjan tarapy qaza tapqan ekıpaj músheleriniń otbasylaryna kóńil aıtady jáne zardap shekkenderdiń tezirek saýyǵyp ketýin tileıdi. Ázerbaıjandyq tarap tıisti ótemaqy tóleýge daıyn ekenin málimdeıdi»,- delingen Ázerbaıjan SІM málimdemesinde .