Reseılik maman prokýrorlardy sheshendikke úıretti

ASTANA. QazAqparat - Kóshbasshylyq, sheshendik óner jáne ózin-ózi damytý boıynsha belgili reseılik maman Radıslav Gandapas búgin Bas prokýratýrada «Qazirgi zamandaǵy uıymnyń kóshbasshysy» taqyrybynda trenıng ótkizdi.

Bas prokýratýranyń baspasóz qyzmetiniń habarlaýynsha, ol tyńdaýshylarǵa ózderiniń kásibı talanttaryn jáne kóshbasshylyq qasıetterin ashýǵa, ózin-ózi damytýdyń perspektıvalaryn kórýge, tıimdi menedjer jáne basqarýshy bolýǵa úıretýge, óz baǵynyshtylaryn jetistikke jetýge jáne qoıylǵan maqsattaryna qol jetkizýge yntalandyrýǵa qatysty oılaryn jetkizýge tyrysty.

Qatysýshylardyń pikiri boıynsha trenıng óte paıdaly jáne tıimdi boldy. Prokýrorlar ózderin damytýǵa jáne kásibı qyzmetterinde árqaısysy úshin qajet keńester men usynystardy kózbe-kóz tyńdaýǵa qaıtalanbas múmkindik aldy.

«Bul is-sharanynyń ózektiligi «100 naqty qadam» Ult josparynyń kásibı memlekettik apparatty qalyptastyrý jáne adam kapıtalynyń sapasyn jaqsartý negizinde elimizdiń odan ári jemisti damýyna baǵyttalǵan mańyzdy tarmaǵynyń maqsattarymen tutastaı sáıkes keledi», delingen habarlamada.

Ótkizilgen trenıng prokýratýranyń sapaly túrde jańarýy, talantty ári progressıvti oılaıtyn qyzmetkerlerdi jáne tıimdi basshylardy tárbıeleý jónindegi mindetterdi júzege asyrýǵa kómektesetin bolady.