Reseılik kompanııadan zardap shekken fermerlerge kómek kórsetiledi – mınıstrlik
Vedomstvo fermerler shetten maldy jetkizý operatoryn ózderi tańdaǵanyn, QR Aýyl sharýashylyǵy mınıstrligi, «QazAgro» holdıngi men onyń enshiles uıymdarynyń qatysýynsyz jasalǵanyn málimdedi.
«QazAgro» holdınginiń enshiles kompanııalarynan nesıe qarajatyn alǵannan keıin, qazaqstandyq fermerler «KamAgro» kompanııasymen Chehııa men Polshadan 1 269 iri qara malyn jetkizý týraly kelisim jasasqan.
«Ary qaraı kelisimsharttyq mindettemelerge sáıkes, fermerler «KamAgroǵa» kelisimshart somasynan orta eseppen 89 paıyz avans jibergen. 1269 bas iri qara maldyń tek bir bóligi ǵana jetkizilgen. Sonymen qatar, qazaqstandyq fermerler Reseıdiń «KamAgro» kompanııasyna múıizdi iri qara maldyń asyl tuqymy týraly shaǵym túsirip otyr, ıaǵnı asyl tuqymdy maldyń ornyna, saýdalyq mal jetkizilgen», - delingen QR AShM baspasóz qyzmetiniń habarlamasynda.
Qazaqstan Respýblıkasynyń «Asyl tuqymdy mal sharýashylyǵy týraly» Zańyna sáıkes, asyl tuqymdy maldyń mártebesin táýelsiz akkredıttelgen qoǵamdyq uıymdar belgileıdi. Osy oraıda uıym Chehııa men Polshadan «KamAgro» ákelgen maldyń tuqymdyq mártebesin rastamaǵan.
«Oryn alǵan jaǵdaıǵa baılanysty QR Aýyl sharýashylyǵy mınıstrligi ókilderi fermerlermen birge Qazan qalasyna baryp, Tatarstan Respýblıkasynyń Aýyl sharýashylyǵy jáne azyq-túlik mınıstrliginiń alańynda birneshe ret kelissózder ótkizdi. Sonymen qatar, Chehııa Aýyl sharýashylyǵy mınıstriniń orynbasarymen jáne Chehııa Respýblıkasynyń Qazaqstandaǵy Elshisimen kezdesýler uıymdastyrdy. Osy kezdesýlerdiń jáne Tatarstannyń quqyq qorǵaý organdarymen ózara jumys júrgizýdiń nátıjesinde, Qazaqstan Aýyl sharýashylyǵy mınıstrligi fermerlerdiń múddeleri úshin qylmystyq is qozǵaýǵa qol jetkizdi», - dep atalyp ótken taratylǵan málimette.
Qazirgi ýaqytta mınıstrlik 16 qazaqstandyq fermerdiń problemalaryn sheshý úshin barlyq sharalardy qabyldaýda.
«QazAgro» holdınginiń enshiles kompanııalaryna zardap shekken fermerlerge tólemdi keıinge qaldyrý jáne syıaqyny 2020 jyldyń 1 shildesine deıin toqtata turý usynyldy. Barlyq aıyppuldar da alynyp tastalady.
Bul másele QR Aýyl sharýashylyǵy mınıstrliginiń qadaǵalaýyna alynyp, 16 fermerge turaqty keńes berilip, arnaıy mamandar bekitildi. Osy oraıda únemi baqylaý júrgiziledi jáne barlyq kelip túsken ótinishter jeke qarastyrylady.