Reseılik kompanııa Qazaqstanǵa ozyq qoljetimdi tehnologııalardy engizýge kómektespek
ASTANA. QazAqparat - Reseılik kompanııa Qazaqstanǵa ozyq qoljetimdi tehnologııalardy engizýge kómektesýge daıyn. Bul týraly búgin Reseıdiń «Ekologııalyq jáne ónerkásiptik saıasat» ǵylymı-zertteý ınstıtýty dırektorynyń orynbasary Vladımır Marev aıtty, dep habarlaıdy QazAqparat tilshisi.
«Qazaqstannyń ozyq qoljetimdi tehnologııalar prıntsıpine kóshýi: qazirgi jaǵdaı men keleshegi» atty halyqaralyq konferentsııa aıasynda BAQ ókilderine suhbat bergen Vladımır Marev qysty kúni Astana aspanyn basatyn tútinnen qalaı qutylý qajettin atap ótti.
«Bul tútinniń qaıdan shyǵatynyn anyqtaý qajet. Eger ol avtomobılder shyǵaratyn qaldyqtar bolsa, onda bul iri qalalardyń úlken problemasy. Sondyqtan onyń sheshimi - otynnyń jańa túrlerine kóshý jáne atalǵan otyn túrin paıdalanatyn avtomobıl parkine baqylaý jasaý. Qazirgi ýaqytta mundaı shara Máskeýde qoldanylyp, kólikten shyǵatyn qaldyqtardy tómendetýge kómektesetin eýro standartyna kóshirilýde. Eger bul problema jylý energetıkasy quramyna kiretin qýat óndirýshi kásiporyndarmen baılanysty bolsa, onda bul basqa másele. Bul - otyndy daıyndaý, súzgi, otynyń basqa túrlerine kóshý. Sondyqtan tútinniń qaıdan shyǵatynyn bilý qajet», - dedi ol.
Sonymen qatar ol ozyq qoljetimdi tehnologııalardy engizý qaldyqtardy qysqartýǵa baǵyttalǵanyn atap ótti. Reseılik kompanııalar Qazaqstanda eń ozyq qoljetimdi tehnologııalardy engizýge qyzyǵýshylyq tanytyp otyrǵandyǵyn da aıtty.
«KazWaste» qaýymdastyǵymen birlese jumys istep, jańa tehnologııalar jaıynda aqparat almasyp otyramyz. Buǵan qosa, qandaı qaldyqtar jınalǵany jáne olarmen ne isteý qajettigi jaıynda da aqparat almasýǵa kelistik. Degenmen, «Ekologııalyq jáne ónerkásiptik saıasat» ǵylymı-zertteý ınstıtýty tarapynan birlesken óndiris qurý jaıynda sóz bola qoıǵan joq. Degenmen, biz soǵan kelemiz dep oılaımyn», - dedi reseılik sarapshy.
Aıta keteıik, osyǵan deıin Qazaqstan tabıǵatty paıdalanýshylar qyzmetin ekoretteýdiń jańa rejimin engizetindigi týraly habarlaǵanbyz.
Sondaı-aq Qorshaǵan ortaǵa keltirilgen zalaldyń ótemi retinde tólengen qarajattyń maqsatsyz jumsalǵandyǵyn jazdyq.
