Reseılik iz kesýshiler Kalýga mańynda qaza tapqan qazaqstandyqtardyń urpaqtaryn izdep jatyr
ATYRAÝ. QazAqparat - Reseılik iz kesýshiler Kalýga mańynda Ekinshi dúnıejúzilik soǵysta qaza tapqan qazaqstandyqtardyń urpaqtaryn izdep jatyr, dep habarlaıdy «QazAqparat» HAA tilshisi.
«Reseılik iz kesýshier Ýlıanovsk aýdany Nagaıa aýylynda «Kalýjskıe zasekı» memlekettik qoryǵynyń aýmaǵynda júrgizgen izdeý jumystary barysynda 1943 jylǵy medıtsınalyq qabirlerdi tapqandaryn habarlady. Olar jumysshy-sharýa qyzyl áskeriniń 28 jaýyngeriniń súıekterin tapqan. Jaýyngerlerdiń birinen qaǵazǵa jazylǵan qosymshasy bar sarbaz medalony tabylǵan jáne ondaǵy jazýdyń óship qalǵanyna qaramastan, oqýǵa múmkindik bolǵan. Onyń Gýrev oblysynan maıdanǵa shaqyrylǵan Aleksandr Dmıtrıevıch Tarakanov ekeni belgili boldy. Qorǵanys mınıstrliginiń ortalyq arhıvindegi qujattarǵa sáıkes, bul jaýyngerdiń deregi boıynsha qalǵan 27 adamnyń esimderin anyqtaǵan. Arhıvtik qujattardan belgili bolǵandaı, bul súıekter 26-shy Gvardııalyq atqyshtar dıvızııasynyń 75 jáne 77 Gvardııalyq atqyshtar polkiniń jaýyngerlerine tıesili. Olar 1943 jyldyń 14-22 shildesinde osy aýdanda bolǵan shaıqasta jaraqat alyp, qaza tapqan», - dep habarlady Atyraý qalalyq qorǵanys isteri basqarmasy qoǵammen baılanys ınspektory Gúljansara Muhtarova.
1907 jyly Gýrev qalasynda dúnıege kelip, Proletarsk kóshesi, 2 «B» úıinde turǵan Aleksandr Dmıtrıevıch Tarakanov pen onyń jubaıy Anastasııa Petrovnanyń týystary týraly qandaı da bir aqparat biletinderdiń myna telefondarǵa habarlasýyn suraıdy: 51-56-48, 51-56-42.
