Reseılik iri kompanııa AHQO bırjasynyń resmı tizimine engizildi
NUR-SULTAN. QazAqparat - Reseıdiń «Polımetall» kompanııalar toby «Astana» halyqaralyq qarjy ortalyǵy bırjasynyń resmı tizimine engizildi, dep habarlaıdy QazAqparat tilshisi.
«Polımetalldyń lıstıngi halyqaralyq deńgeıde tanylǵan iri emıtenttiń tarapynan Qazaqstannyń ınvestorlyq áleýetine, AHQO quziretine, sondaı-aq AIX-tiń tehnologııalyq múmkindikteri men ınfraqurylymyna degen joǵary seniminiń aıǵaǵy bolyp sanalady. Bul senim elimizdegi jumys tájirıbesine negizdelgeni anyq jáne basqa da orta jáne iri kompanııalar AIX-tiń áleýetti emıtentteri úshin úlgi bolmaq», - dedi «Astana» halyqaralyq qarjy ortalyǵynyń basqarýshysy Qaırat Kelimbetov. 
AHQO bırjasyndaǵy lıstıng Polımetaldyń Qazaqstandaǵy qyzmetiniń alǵashqy 10 jyldyǵymen tuspa-tus kelgen.
«AHQO bırjasyndaǵy lıstıng Polımetaldyń Qazaqstandaǵy qyzmetiniń alǵashqy 10 jyldyǵymen tuspa-tus kelgen aıtýly sát. Bul aktsııalarymyzdy jergilikti ınvestorlar úshin anaǵurlym tartymdy ári qoljetimdi etedi jáne bizge aktsıonerler bazasyn keńeıtýge múmkindik beredi dep úmittenemiz», - dedi «Polımetall» kompanııalar tobynyń atqarýshy dırektory Vıtalıı Nesıs.
Osy rette ol bul alǵashqy qadam ǵana ekendigin atap ótti.
«Biz keshe Almatyda ınvestorlarmen kezdesý barysynda máselelerdi talqyladyq. Eger suranys bolyp jatsa, onda ornalastyrylatyn aktsııalar kólemin ulǵaıtýǵa múmkindik bar», - dedi ol.
«HalykFinance» kompanııasynyń ókili Murat Temirhanovtyń aıtýynsha, Polımetalldyń lıstıngke engizilgen aktsııalarynyń kólemi 10 mln dollardy quraıdy.
«Biz qor naryǵynyń kásibı qatysýshysy retinde muny mańyzdy oqıǵa dep sanaımyz. Sebebi bizde kapıtal naryǵy áli de damý protsesinde tur. Ótken jyly «Qazatomónerkásip» saýda-sattyǵynyń uıymdastyrýshysy boldyq. Ol kezde jaǵdaı múldem túsiniksiz edi, naryq quldyrap, ýran satylymy nasharlap ketken bolatyn. Tipti sondaı álsiz marketıngtiń ózinde satylym 64 mln dollardy qurady. Sondyqtan Qazaqstanda ınvestorlar úshin úlken múmkindik bar deýge bolady», - dedi M.Temirhanov.
Aıta keteıik, 2009 jyldan beri Qazaqstanda jumys isteıtin Polımetall Shyǵys Qazaqstan oblysynda «Qyzyl» jáne Qostanaı oblysynda «Varvarınskoe» jobalaryn júzege asyryp jatyr. Bul kompanııa tobynda elimizde 2500 adam jumys isteıdi. Ótken jyly Polımetalldyń Qazaqstandaǵy aktıvteri 238 myń ýntsııa altyn óndirdi.
