Reseılik ınspektorlar Qazaqstanǵa balyq pen kartop ótkizýdiń jolyn kesti
ASTANA. QazAqparat - Reseıdiń Rýbtsov jáne Tretıakov aýdandarynda Altaı óńiri men Altaı Respýblıkasy boıynsha Reseı aýyl sharýashylyǵy baqylaý basqarmasynyń qyzmetkerleri Reseıden Qazaqstanǵa jalpy salmaǵy 5,1 tonna bolatyn balyq, qurǵaq sút jáne kartop ónimderin ótkizbedi.
Altaı óńiri men Altaı Respýblıkasy boıynsha Reseı aýyl sharýashylyq baqylaý basqarmasy baspasóz qyzmeti 2017 jyldyń 25 sáýirinde Qazaqstan azamatynyń Rýbtsov aýdany aýmaǵynan Óskemen qalasyna 350 keli qurǵaq sút, veterınarlyq-ilespe qujattarynsyz 1,5 tonna muzdatylǵan balyq (maıshabaq, skýmbrııa, kambala) jáne fıtosanıtarlyq sertıfıkaty joq 3,2 tonna kartop alyp ótpek bolǵanyn habarlady. Syrtqa taýar shyǵarý qaǵıdasyn buzǵany úshin júk ıesi ákimshilik jaýapkershilikke tartyldy. Reseı aýyl sharýashylyq baqylaý basqarmasynyń ınspektorlary júkti ótkizýge tyıym salyp, atalǵan azyq-túlik ónimderin eksportqa shyǵarýdyń tártipterin túsindirdi.
Sol kúni joǵaryda atalǵan júkti Tretıakov aýdanynda Altaı óńiri men Altaı Respýblıkasy boıynsha Reseı aýyl sharýashylyǵy baqylaý basqarmasynyń ınspektorlary ustady. Qazaqstan azamaty qaýipsizdik týraly qujattary joq azyq-túlikti Altaı óńirinen Qazaqstanǵa taǵy da alyp ótýge árekettengen. Júk shekaradan ótkizilmedi jáne quqyq buzýshy taǵy da ákimshilik jaýapkershilikke tartyldy.
Kúmándi azyq-túlikti Reseı Feredatsııasynan Qazaqstan Respýblıkasyna ótkizýge jol bermeý sharasyn Altaı óńiri boıynsha Reseı Federaldy qaýipsizdik qyzmeti Shekara basqarmasynyń qyzmetkerleri júzege asyrdy.
Foto: Altaı óńiri men Altaı Respýblıkasy boıynsha Reseı aýyl sharýashylyq baqylaý basqarmasy
