Reseılik ǵaryshkerler ǵaryshtan Qazaqstanǵa quttyqtaý joldady

ASTANA. QazAqparat - Búgin Qazǵaryshtyń 25 jyldyǵyna arnalǵan forým kezinde eki reseılik ǵaryshker Halyqaralyq ǵarysh stansasynan óz quttyqtaýlaryn jetkizdi, dep xabarlaıdy QazAqparat tilshisi.

"Búginde Qazaqstanda baılanys pen xabar taratýdyń zamanaýı ǵarysh júıeleri bar. Jerdi qashyqtan zondtaý, jer serikteri jáne taǵy basqa ǵarysh texnıkasy jasalady. Halyqaralyq ǵarysh stansasynda jumys istegen áriptesterimizdiń ishinde úsh Qazaqstan azamaty - Toqtar Áýbákirov, Talǵat Musabaev pen Aıdyn Aıymbetov boldy. Soǵan shyn júrekten qýanyshtymyz. Bizder, ǵaryshkerler úshin Qazaqstanyń orny bólek. Sebebi dál osy jerden 1957 jyly alǵash ret jasandy jer serigi ushyryldy. Al 1961 jyly ıÝrıı Gagarın tuńǵysh ret saparǵa attandy. Qazirdiń ózinde Baıqońyr ǵaryshtyń basty qaqpasy bolyp sanalady. Biz, reseılikter men qazaqstandyqtar - kórshi, dos ári áriptespiz. Ǵarysh bizdi odan saıyn jaqyndatty", - dedi 55-shi ekıpajdyń komandıri Anton Shkaperov.

Ekıpajdyń bort ınjeneri Oleg Artemev te óz quttyqtaýyn jetkizdi. Onyń aıtýynsha, Qazaqstan Prezıdenti Nursultan Nazarbaevtyń eren eńbegi arqasynda ári Reseımen aradaǵy tyǵyz qarym-qatynastyń nátıjesinde Baıqońyrdyń mártebesi óse tústi. Búginde ol jerde eki eldiń mamandary ǵana emes, sheteldiń azamattary da jumys istep keledi. Osylaısha, "Baıqońyr" ǵarysh aılaǵy xalyqaralyq dárejege kóterilip otyr. "Biz, Halyqaralyq ǵarysh stansasynyń 55-shi ekıpajy Qazaqstannyń qorǵanys jáne aeroǵarysh ónerkásibi mınıstriliginiń aeroǵarysh komıtetin, osy saladaǵy kásiporyndar men uıymdardy Qazǵaryshtyń 25 jyldyǵymen shyn júrekten quttyqtaımyz. 1993 jyly Qazaqstannyń Mınıstrler kabıneti janynan Ulttyq aeroǵarysh agenttigi qurylǵan bolatyn. 25 jyldyń ishinde Qazǵarysh biraz jetistikterge jetip, Qazaqstannyń ǵarysh salasyn qalyptastyra bildi", - dep atap kórsetti O.Artemev.

Aıta keteıik, búgin Astanada V halyqaralyq «KADEX-2018» qarý-jaraq pen áskerı texnıka kórmesi ashyldy. Atalǵan sharanyń ashylý saltanatyna QR Prezıdenti Nursultan Nazarbaev qatysty. 

Memleket basshysy kórmeniń negizgi ereksheligin atady. Kórme  26 mamyrǵa deıin jalǵasady. Oǵan Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan, Izraıl, Italııa syndy 40-tan astam elderdiń ókilderi qatysady. Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin usynady.

Kórmeniń uıymdastyrýshylary - QR Qorǵanys jáne aeroǵarysh ónerkásibi mınıstrligi, sondaı-aq "Qazaqstan ınjınırıng" UK" AQ.