Reseılik ǵalymdar ultaralyq, etnosaralyq kelisim máselesindegi qazaqstandyq tájirıbeni moıyndap otyr - E.Toǵjanov

Óıtkeni búginde álemniń kóptegen memleketterinde oryn alyp otyrǵan aımaqtyq, ultaralyq, dinaralyq qaıshylyqtardyń basty sebepteriniń biri atalmysh faktorlardyń bir-birine shúıligýi, bir-birine tóze almaýy sııaqty máseleler bolyp otyr. Bul týraly búgin «Qazaqstan: birlik pen áralýandylyq jolynda» atty taqyrypta ǵylymı-tájirıbelik konferetsııa barysynda Qazaqstan halqy Assambleıasy Hatshylyǵynyń meńgerýshisi Eraly Toǵjanov málim etti, dep habarlaıdy QazAqparat.

 Onyń sózine qaraǵanda, ultaralyq, dinaralyq birlik máselesindegi     qazaqstandyq tájirıbe qazir kóptegen elderdiń qyzyǵýshylyǵyn týdyryp otyr. Sońǵy úsh aıdyń ishinde bizdiń tájirıbemizben tanysyp, zerttep qaıtý úshin  elimizge Frantsııa, Norvegııa, Ulybrıtanııa, AQSh, GFR, Fınlıandııa, Qytaı, Ispanııa, Avstrııa sııaqty elderden kóptegen qonaqtar kelip ketti. «Osy oraıda aıta ketý kerek, bul tek óz elderinde birlikti qamtamasyz etýge erekshe umtylyp otyrǵan memleketterdiń ǵana tizimi. Qazirgi tańda etnosaralyq jáne konfessııaaralyq kelisim máselesine baılanysty qazaqstandyq tájirıbe boıynsha Máskeý Memlekettik ýnıversıtetinde arnaıy kýrs uıymdastyrylǵan. Bul bizdiń ishki birlik máselesinde ustanyp otyrǵan saıasatymyzdy Reseıdiń ǵalymdarynyń moıyndap otyrǵandyǵynyń belgisi. Jyl sońyna deıin bizdiń ǵalymdar Reseıdiń atalmysh joǵary oqý ornynda jyl sońyna deıin 36 saǵat dáris oqıtyn bolady. Al osyǵan deıin orystardyń ózderiniń talap-tilekteri boıynsha dárister qazaq tilinde de oqyldy», dedi E.Toǵjanov.

 Onyń aıtýynsha,  ultaralyq, etnosaralyq, dinaralyq kelisim máselesi  bizge ásirese Eýropadaǵy qaýipsizdik jáne yntymaqtastyq uıymyna tóraǵalyq etýimizdiń tusynda erekshe mańyzdy bolmaq. «Sondyqtan ol bizdiń mıssııamyzdyń basty taqyryptarynyń birine aınalýy tıis», dedi Hatshylyq meńgerýshisi.