Reseılik ǵalymdar 50 mıllıon jylǵy DNK-nyń jumbaǵyn sheshkenin habarlady
ASTANA. 8 sáýir. QazAqparat - Reseılik ǵalymdar Kanadanyń soltústinde 50 mıllıon jylǵa jýyq buryn ósken ejelgi metasekvoııa DNK-synyń qupııasyn ashqanyn málim etti, dep habarlady «Lenta.rý».
Ejelgi ósimdikterdiń qylqan japyraqtaryn peterborlyq ǵalymdar 15 jylǵa jýyq ýaqyt buryn alyp, jyljarym ýaqyt buryn Altaı memlekettik ýnıversıtetine bergen bolatyn. Munda Altaı MÝ Ońtústik-Sibir botanıkalyq baǵy dırektorynyń ǵylym jónindegi orynbasary Maksım Kýtsev bul úlgilerden DNK bólip shyǵardy.
Maksım Kýtsevtiń aıtýynsha, RǴA-nyń Sankt-Peterbor botanıka ınstıtýtyndaǵy áriptesterimen jáne kanadalyq ǵalymdarmen birlesip júrgizilgen tájirıbe jarııalanymǵa ázirlenýde. Ázirge ol basqa ǵalymdardyń pikirlerin alǵan joq.
Zertteýshiler nýkleın qyshqylynyń keıbir fragmentterin polımerazdyq tizbekti reaktsııa kómegimen kóbeıtti jáne olardyń rettiligin anyqtady. Ósimdikterdiń týystyq baılanystaryn taldaýda qoldanylatyn hlorly qabattar men ıadrolyq DNK fragmentteri tańdalyp alyndy. Bul fragmentterdiń rettiligi Qytaıda ósetin relıktilik metasekvoııa fragmentterimen salystyryldy. Kýtsevtiń aıtýynsha, olardyń rettiligindegi ózgesheligi kútkendegiden az boldy Onyń pikirinshe, bul keıbir túrler evolıýtsııasynyń birkelki emes ekendigin kórsetedi. Ǵalymnyń aıtýynsha, bul málimetter barlyq tiri zattardyń DNK evolıýtsııasynyń jyldamdyǵy birdeı degen «molekýlıarlyq saǵat» teorııasynyń dáıeksiz ekenin bildiredi. Buǵan deıin de kóptegen ǵalymdar «molekýlıarlyq saǵat» teorııasyn joqqa shyǵaryp júrgenin reseılik BAQ jarysa jazǵan bolatyn. Degenmen Aqparatty berý problemalary ınstıtýty dırektorynyń orynbasary, bıoaqparatshy Mıhaıl Gelfand avtorlardyń málimdemeleri «áli erterek» jáne asyǵys qorytyndy degen pikirin aıtty.
