Reseılik ǵalym EAEO aıasynda birlesken tehnologııalyq jáne ǵylymı jobalar qurýdy usyndy

NUR-SULTAN. QazAqparat - Eýrazııalyq ekonomıkalyq odaq aıasynda birlesken tehnologııalyq jáne ǵylymı jobalar qurýǵa batyl qadam jasaýymyz qajet. Bul týraly «Eýrazııalyq ıntegratsııa - N.Nazarbaevtyń tarıhı bastamasy» taqyrybyndaǵy onlaın rejımde ótken telekópir barysynda M.Lomonosov atyndaǵy MMÝ professor, ekonomıka ǵylymdarynń doktory Kaısyn Hýbıev aıtty, dep habarlaıdy QazAqparat tilshisi.

«Eýrazııalyq ekonomıkalyq odaq Keden odaǵy negizginde quryldy. Endi kelesi qadamdy ekonomıkalyq naqty sektorlarynyń salasynda, sonymen qatar onyń ǵylymyn qoldaıtyn jáne negizdeıtin salalarynda jasaý qajet. Menińshe, bizdiń bul baǵytta birge qorymyz da jetkilikti. Myna máselege nazar aýdartsam deımin. Reseılik venchýrlyq qor men Reseılik-qazaqstandyq nanotehnologııalar qory bar. Osy eki qor energııa jınaqtaý júıesin daıyndaǵany úshin amerıkalyq ázirleýshilerge 11,5 mln dollar tóleıdi. Alaıda, elderimizdi elektr energııasy akkýmýlıator jasap shyǵaratyn ǵylymı-tehnıkalyq áleýet qalaısha joq? Amerıkalyq ázirleýshilerge júgingenshe ózimiz nege jasamasqa», - dedi ol.

Ǵalym EAEO-ǵa qatysýshy árbir elde tsıfrlyq tehnologııalardy damytýdyń ulttyq baǵdarlamasy bar ekendigin nazar aýdartty.

«Osy oraıda da kúsh-jigerimizdi biriktirip, ony tsıfrlyq tehnologııalardy, onyń ishinde bilim salasyndaǵy da tehnologııalardy damytýǵa jumsaýǵa bolar edi. Biz ekonomıkanyń shynaıy sektorlaryn kóterý úshin birlesken tehnologııalyq jáne ǵylymı jobalardy qurýǵa batyl qadam jasaýǵa tıispiz», - dedi Kaısyn Hýbıev.

Eýrazııa ulttyq ýnıversıteti men M.Lomonosov atyndaǵy MMÝ-diń Qazaqstandaǵy fılıaly birlesip uıymdastyrǵan telekópir barysynda eýrazııalyq ıntegratsııanyń tujyrymdamalyq máseleleri, odaq memleketteriniń bilimi men ekonomıkalyq ósimi arasyndaǵy ózara baılanys, ǵylym men zamanaýı ınnovatsııalyq tehnologııalardy damytý, eýrazııalyq ekonomıka jáne mádenı yntymaqtastyq vektorlary talqylandy.