Reseılik fantast-jazýshy S.Lýkıanenko fantastıkalyq shyǵarmalardyń «Baıqońyr» halyqaralyq baıqaýynyń qazylar alqasynyń músheligine endi

Bul týraly «Bolashaq» halyqaralyq stıpendııasy qaýymdastyǵynan habarlady.

«Baıqońyr» qoǵamdyq syılyǵynyń qazylar alqasynyń quramyna áıgili reseılik fantast-jazýshy, «Túngi sholǵynshy», «Kúndizgi sholǵynshy», «Alakeýimdegi sholǵynshy» kitaptary men Tımýr Bekmambetov túsirgen attas fılmderdiń stsenarııleriniń avtory qosyldy.

Sergeı Vasılevıch Lýkıanenko Qazaqstannyń Qarataý qalasynda dúnıege kelip, Almaty memlekettik medıtsına ınstıtýtyn dáriger-psıhıatr mamandyǵy boıynsha bitirgen. Ótken ǵasyrdyń 80-shi jyldarynyń sońynda Almaty qalasynyń «Alfa-Pegas» fantastıka klýbynyń negizin qalaǵan. Qazirgi ýaqytta S.Lýkıanenko Máskeý qalasynda turyp, qyzmet etedi.

Jazýshy «Aelıta», «Juldyzdy kópir», Platına Tarlany, Aleksandr Grın atyndaǵy syılyqtardyń ıegeri. «El kezýshi» syılyǵynyń birneshe atalymy boıynsha jeńimpaz.

Baıqaý jeńimpazdaryn S.Lýkıanenkomen birge qazaqstandyq fantastıkanyń negizin qalaýshylar - Abdýl-Hamıd Marhabaev pen Medeý Sársekeev, jazýshy, aqyn, ǵalym Orynbaı Janaıdarov, qazaq ádebıetindegi alǵashqy áıel fantast-jazýshy Narbın Kenjeǵulova anyqtaıtyn bolady.

Eske salaıyq, QR Táýelsizdiginiń 20 jyldyǵyna oraı «Bolashaq» Qaýymdastyǵy men qazaqstandyq fantastıka áýesqoılary álemdik ǵylymı fantastıka ilimi men ǵaryshty ıgerý isiniń damýyna qosqan úlesi úshin beriletin «Baıqońyr» qoǵamdyq syılyǵyn jarııalaǵan bolatyn. Syılyq sheńberinde 1 naýryz ben 12 sáýir aralyǵynda mektep oqýshylary arasynda alǵashqy respýblıkalyq ádebı fantastıkalyq áńgimeler baıqaýy ótkizildi. Baıqaýǵa Qazaqstannyń túkpir-túkpirinen 800-den astam jumys joldandy.

Odan keıin, naqty aıtqanda 12 sáýir - Halyqaralyq ǵaryshkerler kúni fantastıkalyq áńgimelerdiń «Baıqońyr» halyqaralyq jastar baıqaýy jarııalandy. Eń úzdik týyndylar ádebı jýrnaldarda, kitap jınaqtarynda jarııalanatyn bolady.