Reseılik ekspedıtsııa músheleri Qyzylordada boldy
QYZYLORDA. QazAqparat - Ústimizdegi jyldyń 17 sáýirinde Reseıdiń Nıjnevartovsk qalasynan bastalǵan «Jeńis - barlyǵymyzǵa bireý!» medıa-ekspedıtsııa músheleri Qyzylorda oblysynda aıaldady, dep habarlaıdy QazAqparat tilshisi.
Ekspedıtsııa músheleriniń aıtýynsha, bul shara bıyl jetinshi márte ótkizilip otyr. Jylma-jyl dástúrli túrde jalǵasyp keledi. Onyń quramynda Reseıdiń okrýgtik jastar parlamentiniń músheleri bar. Olar aldymen 5 «GAZ-20» jáne «Pobeda» kólikterinen quralǵan kortejben Reseıdiń kóptegen qalalaryn aralap shyqty. 20 sáýir kúni Soltústik Qazaqstan oblysynyń ortalyǵy - Petropavl qalasyna keldi. Odan elimizdiń ózge de qalalarynda bolyp, onda soǵys jáne tyl ardagerlerimen júzdesti. Ózderi qadam basqan árbir óńirde máńgilik alaý eskertkishterine gúl shoqtaryn qoıdy.
Qyzylorda qalasynda ótken avtosherý múshelerimen júzdesýde qala ákiminiń orynbasary Shahmardan Baımanov júrekjardy lebizin bildirdi. Al ekspedıtsııa basshysy Nıkolaı Zabolotnev te óz rızashylyǵyn arnady. Ol «Qazaq halqynyń qonaqjaılyǵy bizdi tánti etedi. Sol úshin alǵys bildirgim keledi. Uly Jeńis meıramy qazaq jerinde de keń aýqymda toılanyp jatqany qýantady. Soǵys jáne tyl ardagerlerine qurmet joǵary ekenin ańǵardym»,- dedi ol.
Ekspedıtsııa músheleri 9 mamyrda óz eline jetip, bul sharany qorytyndylaýdy josparlap otyr.
Ádiljan Úmbet
