Reseılik dıplomattar Ýhannan oralǵan soń karantınge jatqyzylmaq

BEIJІŃ. TASS-QazAqparat –Koronavırýs órshigen Qytaıdyń Hýbeı provıntsııasynan Reseı Federatsııasynyń azamattaryn evakýatsııalaýǵa daıyndaý jumystaryna qatysqan reseılik eki dıplomat ekiaptalyq karatınge jatqyzylady. Bul týraly juma kúni QHR-daǵy Reseı elshisi Andreı Denısov tilshilerge aıtyp, dıplomattar karantınde elshilik aýmaǵynda bolatynyn málim etti, dep habarlaıdy TASS.

Elshiniń aıtýynsha, dıplomattar Ýhanǵa reseılikterdi evakýatsııalaý sharasyna shuǵyl jetekshilik etý úshin barǵan. «Olardyń (RF azamattarynyń) sol jaqta bolýyn uıymdastyrý, sýmen, qarapaıym taǵammen qamtamasyz etý kerek boldy. Osynyń barlyǵyn elshiliktiń eki qyzmetkeri jasady», - dedi ol.

«Olar búgin nemese erteń tańerteńmen Beıjińge qaıtýy kerek. Sol jaqta oqshaýlanǵan ǵımarat bar, olarǵa bárin daıyndap qoıdyq: sý, ınternet, teledıdar, úıge arnalǵan aıaq-kıimder, tońazytqyshta azyq-túlik bar», - dep habarlady elshi.

«Qytaı bıligi 2019 jyldyń jeltoqsan aıynyń sońynda Hýbeı provıntsııasynyń Ýhan qalasynda 2019-nCoV vırýsynan paıda bolǵan jańa pnevmonııa túrin tirkedi. QHR-dan bólek, ınfektsııany 24 eldiń azamattary juqtyrǵany anyqtaldy, onyń ishinde Reseı de bar. Dúnıejúzilik densaýlyq saqtaý uıymy indetke baılanysty halyqaralyq dárejedegi tótenshe jaǵdaı jarııalap, ony oshaǵy kóp epıdemııa dep sıpattady. Sońǵy málimetter boıynsha, Qytaıda aýrý juqtyrǵandar sany 31,1 myń adamnan asty, 630 adam mert boldy, 1,5 myńnan astamy saýyqty», - dep jazady TASS.

RF elshiliginiń baǵalaýy boıynsha, Hýbeı provıntsııasynda Reseıdiń 341 azamaty bolǵan, olardyń 183-i dıplomattarmen baılanysqa shyqty. 5 aqpan kúni Reseı Áskerı-ǵarysh kúshteriniń eki borty Ýhan qalasynan 144 adamdy Túmenge jetkizdi. Olardyń 128-i reseılik, jáne EAEO pen Ýkraına azamattary bar. RF bas sanıtarlyq dárigeri Anna Popovanyń habarlaýynsha, Reseıge evakýtsııalanǵan azamattar ózderin jaqsy sezinedi, olarda koronavırýstyń jańa túriniń belgileri joq.