Reseılik dárigerler Shymkentte koronavırýsqa qarsy kúres boıynsha kómek kórsetedi

ShYMKENT. QazAqparat – Shymkent qalasyna Reseıden bir top dáriger keldi. Kórshi eldiń mamandary qalada koronavırýs ınfektsııasymen kúres boıynsha tájirıbe almasyp, konsýltatsııalyq-ádistemelik kómek kórsetpek, dep habarlaıdy QazAqparat tilshisi.

Reseılik dárigerlerdiń arasynda ınfektsıonıst, reanımatolog, anestezıolog-reanımatolog, epıdemıologtar bar. Olar 4 topqa bólinip, belgili bir aýrýhanaǵa bekitiledi.

Búgin qala ákimi Murat Áıtenov arnaıy toppen kezdesip, qaladaǵy qazirgi epıdemıologııalyq jaǵdaıdy baıandady.

«Búgingi tańda álem boıynsha dárigerler koronavırýs ınfektsııasyn emdeýdiń jańa ádisterin zerttep, ózara tájirıbe almasýda. Memleketter arasyndaǵy tyǵyz yntymaqtastyqtyń arqasynda biliktilik arttyryp, tájirıbe almasý múmkindigine ıe bolyp otyr. Osy oraıda sizderdi Shymkent qalasynda kórip otyrǵanymyzǵa qýanyshtymyz», - dedi Murat Áıtenov.

Aıta keteıik, búginde qalada koronovırýspen kúreske 3264 medıtsına qyzmetkeri jumyldyrylǵan.