Reseılik tsırk trýppasynyń basshysy qaramaǵyndaǵy qyzmetkerdi óltirgeni úshin ustaldy
ASTANA. 19 sáýir. QazAqparat - Taıvandyq tártip saqshylary Nantoý ýezinde óner kórsetken reseılik tsırk trýppasynyń basshysyn óz qaramaǵyndaǵy adamdy óltirdi degen kúdikpen tutqyndady.
Seısenbi kúni qoıylym barysynda toptyń 57 jastaǵy jetekshisi Rýslan Persaev 2-3 ret attan qulaǵan. Oryn alǵan jaǵdaı úshin ol óziniń 27 jastaǵy áriptesin Artýr Alıkovty aıyptady. Persaevtyń pikirinshe, ishimdikke masaıǵan Alıkov ózi óner kórsetken atty qatty qamshylap otyrǵan. Qoıylym aıaqtalǵan soń, tsırk mamandary toqtaǵan jataqhanada Persaev Alıkovqa ókpesin bildirýdi jalǵastyrǵan. Olardyń arasynda daý týyp, Persaev ashana pyshaǵymen Alıkovtyń keýde qýysyna eki ret suǵyp aldy. Alǵan jaraqattardan Alıkov til tartpaı ketti.
Tártip saqshylary adam ólimi faktisi boıynsha qylmystyq is qozǵap, Persaevtyń qolyna kisen saldy. Taratylǵan málimetterde aıtylǵandaı, Persaev istegen isine ókinip otyr. Aıta ketken jón, reseılik tsırk toby 6 adamnan quralǵan. Olar 2012 jyldyń maýsymynan beri Taıvanda óner kórsetýde.
