Reseılik boıjetken jigit keıpine enip, astananyń qyz-kelinshekterin aldap soqqan

ASTANA. QazAqparat – Áleýmettik jelide 26 jastaǵy reseılik boıjetken jalǵan profıl ashyp, áıelderdiń bastaryn aınaldyryp, aqsha alyp júrgeni anyqtaldy. Bul týraly QazAqparat Astana qalasy polıtsııa departamentiniń baspasóz qyzmetine silteme jasap habarlaıdy.

Nıkıta esimdi jigit bolyp tanysqan alaıaqqa 31 jastaǵy elorda turǵyny 130 myń teńge aýdaryp jibergen. Aldanǵanyn túsingen áıel polıtsııaǵa júginedi.

Anyqtalǵanyndaı, er adamnyń atyn jamylǵan kúdikti romantıkalyq hat almasý arqyly áıelderdiń senimine ábden kirip alady. Munan keıin ıntımdik sıpattaǵy fotosýretterin alyp, olardy áleýmettik jelige salamyn dep qorqytady. Sóıtip, fotosýretterin taratpaýdy ótingen bıkeshterden aqsha talap etedi.

Sotqa deıingi tergep-tekserý barysynda osyǵan uqsas qylmystary úshin buryn sottalǵan, 5 alaıaqtyq iske qatysy bar Reseı azamaty anyqtaldy. Qazir QR Qylmystyq kodeksiniń 190-baby 2-bóligi boıynsha sotqa deıingi tergeý amaldary júrgizilip jatyr. Sheteldik boıjetken ustalyp, túzeý mekemesine qamaldy.

Osy oraıda, Astana qalasynyń Polıtsııa departamenti jeli arqyly tanysýdan saq bolýǵa shaqyrady.

Vırtýaldy tanystarǵa shamadan tys sený qaıǵyly saldarǵa ákelýi múmkin. Olarǵa jeke aqparatty jarııa etpeýińiz kerek jáne sizge qaýip tóndiretin ıntımdik fotosýrettermen bólispegenińiz jón

, - dep eskertedi elordalyq polıtseıler.