Reseılik boıjetken soǵysta qaza tapqan qazaqstandyqtardyń týystaryn izdestirýde

ALMATY. QazAqparat - Qazaq-orys dostyǵy qaýymdastyǵynyń tóraıymy, «Eýrazııa dıalogy» halyqaralyq qorynyń basshysy Aıjan Túzelbekova QazAqparat tilshisine «Vahta pamıatı» aktsııasy týraly aıtyp berdi.

Aıjan Túzelbekova Ivanovo qalasynyń turǵyny.

Ol Dúnıejúzi qazaqtary qaýymdastyǵy jáne Reseıdegi Qazaqstan elshiligimen, Qazaqstan halyqtary qaýymdastyǵymen birige otyryp Ivanovo oblysynda «Vahta Pamıatı» jobasyn júzege asyryp keledi.

Onyń aıtýynsha, jumys toby Ekinshi dúnıejúzilik soǵysy maıdanynda kóz jumǵan 37 jaýyngerdiń tizimin taýyp alǵan. Bul azamattardyń barlyǵy Ivanovo oblysynyń Shýıa qalasynda gospıtalde qaıtys bolǵan. Shýıa Máskeýden 300 shaqyrym qashyqtyqta ornalasqan.

Ekinshi júnıejúzilik soǵys kezinde munda 11 evakogospıtal bolǵan.

Sol kezdegi medıtsına ǵylymynyń deńgeıine baılanysty barlyq sarbazdy aman alyp qalý múmkin bolmaǵan.

«Shýıa qalasynyń áskerı komıssarıaty 37 qazaq jaýyngeriniń tizimin jasaǵan. Olardyń barlyǵy gospıtalde beti beri qaramaı kóz jumdy. Negizinen adamdar týberkýlez aýrýynan qaıtys bolǵan. 28 sarbazdyń dıagnozy sondaı bolǵan. Eki adam - dıstrofııadan, 2 adam oq jaraqatynan ólgen. 36-sy jaýynger, al 1 sarbazdyń sheni kishi serjant bolǵan. Olardyń Qazaqstannyń qaı jerinen kelgeni ár qujatta ártúrli jazylǵan. Keı jerlerde Qazaq KSR delinse, keı qujattarda Aqtóbe, Almaty, Semeı, Qostanaı oblysy dep kórsetilgen. Qazaq sarbazdary Shýıa qalasyndaǵy Troıtsk, Voznesen zırattarynda jerlengen. Osy kisilerdiń týystary bizdi taýyp keledi dep oılaımyz», - dedi Aıjan Túzelbekova.

Boıjetkenniń ákesi Shymkenttiń qazaǵy.

«Meniń ákem Shymkentten. Meniń anammen Ivanovo qalasynda tanysqan. Sosyn ekeýi úılengen. Keńes odaǵy ydyraǵan soń olar Reseıde qalyp qoıǵan. Otbasynda 5 balamyz. Qazir nemere-shóbere súıip otyr.Ekinshi dúnıejúzilik soǵys taqyryby maǵan óte jaqyn. Sebebi 1943 jyly meniń atam iz-tússiz ketti. Іzdep tabýǵa tyrystyq, biraq áli nátıjesiz. Shymkentte Dańq alleıasy bar. Onda meniń atamnyń tegi jazylǵan. Ázirge bizde bar jádiger sol ǵana», - dedi Aıjan Túzelbekova.

Aıjan osy maqsatta Qazaqstanǵa birneshe ret saparlap kelgen. Al Almatyǵa birinshi ret kelip otyr. Ol óziniń ulttyq tegin, urpaq sabaqtastyǵyn joǵaltqysy kelmeıtinin aıtty.

«Іzdep jatyrmyn. Biraq, kóptegen arhıvter qaıta kóshirilgendikten, áripter aýysyp, qujattar joǵalyp, izdeý qıynǵa túsip jatyr. Osy tizimdegi azamattardy tanyǵan adamdar bolsa, olardyń jaqyndaryna habar berip, Dúnıejúzi qazaqtary qaýymdastyǵyna [phone] habarlasýyn suraımyz», - dedi A.Túzelbekova.