Reseılik blogerler jylyna 10 mlrd rýbl tabys tabady
ASTANA. QazAqparat - Búgingi kúni Reseıde 15-17 myńǵa jýyq bloger bar. Olardyń jyldyq tabysynyń jıyntyq mólsheri 10 mıllıard rýblge jetip otyr. Bul týraly RF tsıfrlyq damý, baılanys jáne buqaralyq kommýnıkatsııa mınıstriniń orynbasary Alekseı Volın málimdedi, dep habarlaıdy RIA Novostı.
«Mańyzdy bir tsıfrlarmen bólissem dep otyrmyn: bizdiń esepteýimizshe, qazirgi tańda elde 15-17 myń aınalasynda bloger bar. Olardyń jyldyq tabysynyń jıyntyq mólsheri 10 mıllıard rýblge jetedi. Bul san blogerliktiń jaqsy ári qyzyqty bıznes ekenin kórsetedi», - dedi A.Volın sársenbi kúni Jastardyń búkilreseılik bilim berý forýmynda.
Sheneýniktiń aıtýynsha, eger bloger sapaly kontent jasap, sol arqyly aqsha taýyp jatsa, onyń jýrnalısten aıyrmashylyǵy qalmaıdy.
«Eger bloger osy arqyly tabys taýyp, kásibı turǵyda aınalyssa, jýrnalısten kem jeri bolmaıdy. Adamdy jýrnalıst etetin onyń qolyndaǵy lıtsenzııa nemese kýálik emes», - dedi Volın.
