Reseılik baıqaýshylar saılaý ýchaskelerinen eshqandaı shaǵym túspegenin málim etti
«Qazaqstanǵa tuńǵysh ret kelip turmyn. Sol sebepti, eki kúnniń ishinde qalany aralap, kórikti oryndardan erekshe áser aldym. Elordany aralap júrip, astananyń osy qalaǵa aýystyrylýynyń - taǵdyrsheshti jáne kóregen sheshim ekenine kózim jetti. Qalanyń sáýleti men symbaty erekshe», - dedi elordany aralaý kezinde alǵan áserimen bólisken RF Federaldy jıynynyń Federatsııa keńesiniń múshesi, halyqaralyq baıqaýshy Vladımır Kravchenko.
Halyqaralyq baıqaýshy aralaǵan saılaý ýchaskeleriniń bárinde de halyqtyń mol bolǵanyn atap ótti.
«Biz aldymen saılaý ýchaskelerinde buzýshylyqtar oryn aldy ma, joq pa degen suraqtarǵa jaýap izdegen edik. Tehnıkalyq turǵyda belgili bir jaǵdaılar kezdesti. Máselen, halyqtyń kóbi saǵat tańerteńgi onnan keıin barǵannan soń bolar, uzyn-sonar kezekter týyndaǵan jaǵdaı kezdesti. Keıbir adamdar tizimnen óz atyn izdep tappaı jatty. Biraq, bul máseleler jedel sheshilip jatqanyn atap ótý kerek», - dedi ol.
Vladımır Kravchenko óz sózinde aralaǵan saılaý ýchaskelerinde halyqtan eshqandaı shaǵym túspegenin jetkizdi.
«Bári de Konstıtýtsııaǵa saı júrip jatyr», - dedi reseılik baıqaýshy.
Aıta ketsek, atalmysh baspasóz máslıhatynda taǵy bir reseılik baıqaýshy, «TASS» aqparattyq agenttigi bas dırektorynyń orynbasary Mıhaıl Gýsman saılaýda qazaqstandyqtar erekshe belsendilik tanytyp jatqanyn málim etken edi.
Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.
Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.
