Reseılik basylymda Bas múftıdiń túrkistandyq ǵalym jaıyndaǵy maqalasy jaryq kórdi
ASTANA. 9 qazan. QazAqparat - Reseıdegi Eýrazııa musylmandarynyń toqsan saıyn shyǵatyn «Mınaret» atty qoǵamdyq oı-pikir jýrnaly 2012 jyldyń № 1-2 sanynda (61-78 better) Bas múftı, sheıh Ábsattar qajy Derbisáliniń «Jızn ı dýhovnoe nasledıe Otrarskogo ýchenogo Kavam ad-dına al-Itkanı al-Farabı at-Týrkıstanı» atty kólemdi maqalasyn basqan. Bul týraly Qazaqstan musylmandary Dinı basqarmasynyń baspasóz qyzmeti habarlady.
Qazaqstan dinbasy, ǵalym-múftı Ábsattar qajy 30-35 jyldan beri qazaq jerinen shyqqan 200-den astam ál-Farabıler, Tarazıler, Saıramı (Isfıdjabı), Syǵnaqı, Saýranı, Jendı, Túrkistanı, Kerderı, Dýlatı, Qońyratlı, Naımanı sekildi t.b. qazaq ǵylym-bilimi men rýhanı ómirinde úlken iz qaldyrǵan ǵulamalardyń ómiri men shyǵarmashylyǵyn arab, parsy, túrik jazba derekteri boıynsha talmaı zerttep kele jatqan ǵalym.
Atalmysh maqalasynda ol Túrkistan mańyndaǵy Iqanda týylǵan - HІІІ ǵasyrdyń aıaǵy, HІV ǵasyrdyń birinshi jartysynda ómir súrgen ǵalymnyń ómiri men jazba murasy jaıly derekterdi Túrkııa, Sırııa, Mysyr, Iraktyń qoljazba qorlarynan taýyp eline, búgingi urpaqqa jetkizip otyr.
Bul dúnıe Reseı ǵalymdaryn da qatty qyzyqtyrǵany baıqalady. Maqalaǵa jazylǵan redaktsııa kirispesinde sheıh Ábsattar qajy Derbisáli haziret jaıly óte jyly pikir bildirilgen. Onyń 600-den astam eńbegi bar úlken de parasatty ǵalym ekenin aıta otyryp, jýrnaldyń kóptegen betterine onyń kitaptarynyń muqabasy da berilip otyrǵan.
Sondaı-aq reseılikter ony jýrnaldyń redaktsııalyq keńesiniń múshesi etýdi de mártebe kórgen.
