Reseılik áıel 5 jyl boıy Qazaqstannan zeınetaqy alyp otyrǵan

ÓSKEMEN. QazAqparat – Qazaqstannan 5 jyldan astam ýaqyt boıy zańsyz zeınetaqy alyp kelgen reseılik áıel anyqtaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, kóshi-qon qyzmetiniń mamandary Óskemende qos azamattyq faktisin anyqtady.

64 jastaǵy áıel 17 jyl buryn Reseı azamattyǵyn alǵan. Alaıda Qazaqstanda turǵan ol 5 jyl boıy osy elden zeınetaqy alyp júrdi.

«Qazaqstandyq qujattardy paıdalanǵany úshin quqyq buzýshyǵa QR ÁQBtK-niń 496-baby boıynsha 100 AEK, ıaǵnı 153 150 teńge somasynda aıyppul salyndy. Qazirgi ýaqytta odan qazaqstandyq qujattar tárkilenip, el azamattyǵynan aıyryldy. Sondaı-aq zańsyz alynǵan aqshany qaıtarý máselesi qarastyrylyp jatyr», - dedi oblystyq PD bastyǵynyń birinshi orynbasary Eldos Zakımov.

Jyl basynan beri óńir aýmaǵynda qos azamattyǵy bar 35-ten astam adam anyqtalǵan.