Reseılik ánderdi paıdalanǵan astanalyq meıramhana ıesine aıyppul salyndy
«Palatanyń ortalyq apparatyna kásipkerler ústinen 4 nemese 5 shaǵym tústi. Búginde Astana qalalyq kásipkerler palatasynda 4 shaǵym qaralyp jatyr, onyń bireýi jabyldy", - dedi Astana Kásipkerler palatasynyń Kásipkerlerdi qorǵaý jáne ákimshilik kedergilerdi tómendetý bóliminiń mamany, «Atameken» UKP ótken dóńgelek ústelde.
Astanalyq karaoke-bar ıesiniń shaǵymy dóńgelek ústel uıymdastyrýǵa sebep boldy. Onyń mekemesinde reseılik avtorlardyń 8 áni shyrqalǵany úshin 5 772 00 teńge aıyppul salynǵan. Bul oqıǵa avtorlyq quqyq zańyndaǵy qordalanǵan birneshe máseleniń ushyn shyǵardy. Atap aıtqanda, múliktik quqyqtardy ujymdyq negizde basqaratyn uıymdar avtorlyq týyndylardyń zańsyz oryndalýyn anyqtaýǵa jáne aıyppul salýǵa quqyly.
"Ádilet mınıstrliginde mundaı akkredıttelgen uıymdardyń sany - 9. Olardyń barlyǵy Avtorlyq jáne sabaqtas quqyqtar týraly zańǵa sáıkes, sotqa júgine alady. Túıtkildiń bári osynda. Eger Reseı naryǵynda 4 qana akkredıttelgen uıym bolsa, Qazaqstanda - 9. Shynynda da, bul óte kóp", - dep atap ótti G. Moldaǵalıeva.
Onyń aıtýynsha, múliktik quqyqtardy ujymdyq negizde basqaratyn uıymdar mámilege kelmesten, bıznes ókilderine birden aıyppul salýǵa tyrysady.
"Ujymdyq menshik quqyqtaryn basqarý uıymy kásipkerlik sýbektimen, ıaǵnı paıdalanýshymen beıne nemese aýdıo fonogrammalardy qoldaný týraly lıtsenzııalyq kelisim jasaýy kerek. Biraq, olar quqyqbuzýshylyqty anyqtaǵan jaǵdaıda, birden shaǵym túsiredi. Muny zańdy túsindirý máselesi dep qarastyrǵan jón, óıtkeni kásipkerlerdiń basym bóligi dámhana, meıramhana, karaoke nemese shashtaraz ashqanda onda oınalatyn mýzyka úshin aqy tóleıtinderin bilmeıdi. Biz bul uıymdarǵa aldymen bızneske habarlasýdy, zańdy túsindirýdi jáne lıtsenzııalyq kelisimshart bekitýdi usynamyz. Kásipkerler aqy tóleýden bas tartqan jaǵdaıda ǵana sotqa júgingen jón", - dep óz sózin túıindedi G. Moldaǵalıeva.