Reseılik Almaty oblysynda kisi óltirý kúdigimen tutqyndaldy
ASTANA. QazAqparat - Almaty oblysynyń polıtsııasy jergilikti 54 jastaǵy turǵyndy óltirdi degen kúdikpen Reseı azamatyn ustady, dep habarlaıdy QazAqparat oblystyq ІІD baspasóz qyzmetine silteme jasap.
Vedomstvo málimetinshe, qańtardyń 4-inen 5-ine qaraǵan túnde Eskeldi aýdandyq ishki ister bóliminiń kezekshiligine Qorjynbaı aýylyndaǵy jeke úılerdiń birinen zorlyq-zombylyq belgileri bar adamnyń múrdesi tabylǵandyǵy týraly aqparat túsken. Múrdeden uryp-soqqan izder kórinip turǵan. Kisi ólimi faktisi boıynsha qylmystyq is qozǵaǵan polıtsııa qyzmetkerleri ony ashýǵa baǵyttalǵan sharalardy júzege asyrdy. Nátıjesinde quqyq qorǵaýshylar birneshe saǵattyń ishinde kúdiktini anyqtady. Ol Reseı azamaty bolyp shyqty.
«Kúdikti retinde RF Irkýtsk oblysyna qarasty Svırsk qalasynyń 35 jastaǵy turǵyny ustalyp, kinásin moıyndady. Kúdikti óziniń qylmystyq áreketiniń ishimdik ishý barysynda oryn alǵandyǵyn aıtty. Onyń 2011 jyly Qazaqstan aýmaǵynda qylmystyq jaýapkershilikke tartylǵandyǵy jáne jazasyn ótegennen keıin el aýmaǵynan shyǵarylǵandyǵy anyqtaldy», - delingen taratylǵan aqparatta.
Ustalǵan reseılik azamat Qazaqstan aýmaǵynda zańsyz júrgendigin, 2017 jyldyń mamyrynda memlekettik shekarany zańsyz kesip ótkendigin aıtyp otyr. Qazirgi ýaqytta kúdikti QR QІJK 128 babyna sáıkes qamaýǵa alynǵan. Sotqa deıingi tergeý amaldaryn Eskeldi aýdandyq polıtsııasy júrgizýde.
