Reseıge janarmaı jetkizý: Energetıka mınıstrligi sharttaryn atady
ASTANA. KAZINFORM — QR Energetıka mınıstrligi Reseı Federatsııasyna janar-jaǵarmaı ónimderin jetkizý múmkindigi týraly taraǵan aqparatqa baılanysty túsinikteme jasady.
Mınıstrliktiń aqparatyna sáıkes, Reseı Federatsııasy Úkimetinen avtomobıl otynyn satyp alý jóninde resmı ótinish túsken jaǵdaıda, Qazaqstan ózara tıimdi kommertsııalyq sharttar negizinde janar-jaǵarmaı ónimderin jetkizý múmkindigin qarastyrýǵa daıyn.
— Munaı ónimderin jetkizý salasyndaǵy halyqaralyq kelisimder men kommertsııalyq sharttardy jasasý tek jetkilikti bos resýrstyq áleýet bolǵan jaǵdaıda ǵana múmkin. Qazaqstannyń ishki naryǵyn tolyq ári úzdiksiz qamtamasyz etý — sózsiz basymdyq bolyp qala beredi. Eksporttyq jetkizilimder azamattar men el ekonomıkasynyń qajettilikterin qamtamasyz etýge qaýip tónbegen jaǵdaıda ǵana júzege asyrylýy múmkin, — delingen vedomstvo habarlamasynda.
Buǵan deıin Mańǵystaý oblysynda avtogazǵa suranystyń kúrt artýy men jetkizý merziminiń uzarýyna baılanysty birqatar janarmaı quıý beketinde kezek paıda bolǵanyn jazǵanbyz.
