Reseıge jalǵa berilip otyrǵan 10 mıllıon gektar jerdi qaıtaryp alýdy jalǵastyra bergen lázim - I. Adyrbekov
ASTANA. QazAqparat - Reseıge polıgon úshin jalǵa berilip otyrǵan on mıllıon gektar jerdi qaıtaryp alýdy jalǵastyra bergen lázim. Búgin Parlament Senatynyń jalpy otyrysynda senator Ikram Adyrbekov osylaı málim etti.
Aıta keteıik, jalpy otyrysta Qazaqstan men Reseı arasyndaǵy 929 Memlekettik ushý-synaq ortalyǵynyń obektileri men jaýyngerlik alańdaryn jaldaý týraly shartqa ózgerister engizý týraly hattama qabyldanǵan bolatyn.
«Hattamaǵa sáıkes, Reseı tarapy polıgon úshin alyp otyrǵan alty júz myń gektarǵa tarta jer ýchaskesin qaıtaryp berip otyr. Árıne, bul Reseı úshin ońaı sheshim bolmaǵany anyq. Degenmen, bul Elbasynyń Úkimetke júktegen tapsyrmasy ekenin aıta ketý kerek. Sondyqtan da, polıgon úshin alynyp otyrǵan jerdiń qaıtarylýy el ıgiligine jumys isteıdi dep senemin. Máselen, Atyraý oblysynda qanshama halyq osynyń kesirin tartyp keldi. Kerek bolsa, memlekettiń tıisti kómegin de ala almaǵan, týǵan balalaryna óz elinde tıisti kýálikterin alýǵa da múmkindigi bolmaı qalǵan kezder bolǵan edi», dedi I. Adyrbekov.
Onyń aıtýynsha, Reseı jalǵa alǵan aýmaqta myńdaǵan gektar qunarly jerler bos jatyr. Onyń astynda qazba baılyqtar da barshylyq. Al polıgon aımaǵyndaǵy qur jatqan jerler jyl ótken saıyn qunarynan aıyrylýda.
«Aıta keterlik taǵy bir jaǵymdy jańalyq, osy kelisim kúshine engennen keıin «Qazaeronovıgatsııa» Ońtústik Shyǵys Azııadan Eýropa baǵytyndaǵy tranzıttik marshrýttarǵa eki áýe jolyn usyna alady. ıAǵnı, elimizdiń áýe keńistigindegi tranzıttik áleýeti artyp, bıýdjetke túsim túsedi. Sondyqtan da, biz Reseı tarapynan buryn paıdalanyp kelgen jerlerin zalalsyzdandyrýdy qysqa merzimdi aıaqtaýyn talap etýge tıispiz. Budan bólek, áli de Reseıge jalǵa berilip otyrǵan on mıllıon gektar jerdiń basym bóligin el múddesine qaıtarylýyn jalǵastyrý berýimiz kerek», dedi senator.
