Reseıge jalǵa berilip kelgen 12 myń ga jer Qyzylorda oblysyna qaıtaryldy
QR Qorǵanys jáne aeroǵarysh ónerkásibi mınıstrliginiń baspasóz qyzmetinen málim etkendeı, «Roskosmos» memlekettik korporatsııasy bas dırektorynyń birinshi orynbasary Aleksandr Ivanov pen Qazaqstan Respýblıkasy Aýyl sharýashylyǵy mınıstriniń birinshi orynbasary Qaırat Aıtýǵanov 1994 jylǵy 10 jeltoqsanda qabyldanǵan RF Úkimeti men QR Úkimeti arasyndaǵy «Baıqońyr» keshenin Jalǵa berý shartyna ózgerister engizý týraly Hattamaǵa qol qoıdy.
Qujatqa sáıkes, Baıqońyrǵa jaqyn ornalasqan Aqaı jáne Tóretam aýyldaryndaǵy 11,6 myń gektar jer Reseıge jalǵa berý aýmaǵynan shyǵarylyp, Qyzylorda oblysyna qaıtarylady. Onda aldaǵy ýaqytta áleýmettik-ekonomıkalyq ınfraqurylym damytylatyn bolady.
Buǵan deıin habarlanǵandaı , sondaı-aq Chelıabınskide zymyran tasyǵyshtardyń qulaý aýmaqtaryna qatysty jáne «Baıqońyr» kesheninde, Aqaı jáne Tóretam aýyldarynda turatyn jáne jumys isteıtin qazaqstandyqtarǵa medıtsınalyq qyzmet kórsetý týraly qujattarǵa qosymsha kelisimder jasaldy.