Reseıge zańsyz 6 tonna alkogol ótkizbek bolǵandar qolǵa tústi
ASTANA. QazAqparat - Qazaqstan-Reseı shekarasynan 6 tonnadan artyq alkogol ónimderin alyp ótpek bolǵan birneshe zań buzýshylyq faktiler anyqtaldy, dep habarlaıdy «QazAqparat» HAA QR UQK Shekara qyzmetine silteme jasap.
Vedomstvo aqparatyna sáıkes, Qostanaıdaǵy «Qaıraq avto» ótkizý beketinde Reseıden Qazaqstanǵa ótip bara jatqan «VAZ 2110» kóligindegi 36 jastaǵy qazaqstandyq ustaldy. Tekseris barysynda onyń avtomobılinen 200 lıtr araq tabyldy (400 shısha, 0,5 lıtrden). Sonymen qatar «Mersedes» júk kóligin mingen qazaqstandyq azamat eshqandaı ruqsat qaǵazsyz memlekettik shekaradan 5,1 myń lıtrden astam araq ótkizbek bolǵan kezde qolǵa tústi.
«Saıhın avto» ótkizý beketinde «ÝAZ» avtomobılimen Reseıge ótip bara jatqan qazaqstandyq 41 jastaǵy azamattyń kóliginen 1680 bótelke araq pen 120 bótelke konıak tabyldy. Shekara tártibin buzýshylardyń barlyǵy alkogol ónimderin eshqandaı ruqsat qujatsyz ótkizbek bolǵan.
