Reseıge ushyp baratyn qazaqstandyqtardan PTR anyqtama talap etpeıdi

ASTANA. QazAqparat – Reseıge ushaqpen baratyn qazaqstandyqtarǵa qoıylatyn PTR-synaǵy týraly talap alynyp tastaldy. Bul aqparat Reseıdegi Qazaqstan Elshiliginiń Telegram arnasynda jarııalandy, dep habarlaıdy QazAqparat tilshisi.

«Rospotrebnadzordyń qaýlysyna sáıkes Reseıge keletin sheteldikterdiń, onyń ishinde Qazaqstan azamattarynan koronavırýstyń bar-joǵyn anyqtaıtyn PTR testiniń nátıjesin usyný týraly talap joıyldy. 2022 jylǵy 1 sáýirden bastap Reseıge qurlyqtaǵy ótkizý pýnkteri arqyly kirgen kezde Qazaqstan azamattary úshin teris PTR synaǵy alynyp tastalǵan bolatyn», - delingen elshilik aqparatynda.

Taratylǵan málimetke qaraǵanda, endi Reseıge kelgender tek tıisti saýalnamany toltyrýy kerek.

Atalǵan qaýlyǵa sáıkes, Reseı Federatsııasynyń memlekettik shekarasy arqyly ótetin barlyq ótkizý pýnkterinde koronavırýsqa iriktep synaq alý tájirıbesi uıymdastyrylady.